ДЗЯРЖОРГАНЫДЗЯРЖОРГАНЫ
Флаг Субота, 28 мая 2022
Мінск +11°C
Усе навіны
Усе навіны
Прэзідэнт
28 студзеня 2022, 14:58

Лукашэнка: партнёр нумар адзін для нас - Расія

Фота з архіва
Фота з архіва

28 студзеня, Мінск /Кар. БЕЛТА/. Партнёр нумар адзін для Беларусі - Расія. Аб гэтым Прэзідэнт Беларусі Аляксандр Лукашэнка заявіў сёння ў Пасланні беларускаму народу і Нацыянальнаму сходу, перадае карэспандэнт БЕЛТА.

Кіраўнік дзяржавы адзначыў, што стаўпамі беларускай знешнеэканамічнай стратэгіі з'яўляюцца нарошчванне і дыверсіфікацыя экспарту, прыцягненне інвестыцый і развіццё кааперацыі.

"Партнёр нумар адзін для нас - Расія, з якой паслядоўна рухаемся па шляху эканамічнай інтэграцыі. Практычна палову нашых тавараў экспартуем у гэту краіну, - сказаў Аляксандр Лукашэнка. - Мы развіваем супрацоўніцтва як на двухбаковай аснове ў рамках Саюзнай дзяржавы, так і ў складзе інтэграцыйных аб'яднанняў: Еўразійскага эканамічнага саюза, Садружнасці Незалежных Дзяржаў".

Паводле слоў кіраўніка дзяржавы, для Беларусі асабліва важна развіваць узаемадзеянне з Расіяй у энергетыцы. "У мінулым годзе сумесна пабудавалі і ўвялі ў дзеянне першую Беларускую атамную электрастанцыю, якая з'яўляецца гарантам энергетычнай бяспекі нашай краіны. І пасля выхаду на праектныя магутнасці будзе выпрацоўваць 50 працэнтаў электрычнай энергіі, - нагадаў Прэзідэнт. - На пяць мільярдаў кубоў менш будзем закупляць прыроднага газу для выпрацоўкі электраэнергіі".

Для параўнання ён прывёў паказчыкі ў суседняй Украіне: там 50 працэнтаў электраэнергіі таксама атрымлівалі на 15 атамных энергаблоках, пабудаваных у савецкія часы. "Больш таго, на фоне газавага крызісу прагрэсіўная Еўропа рэзка разварочваецца ў бок мірнага атама, аб'яўляе аб інвестыцыях 500 мільярдаў еўра да 2050 года ў новую праграму ядзернай энергетыкі, - заўважыў кіраўнік дзяржавы. - А памятаеце, нашы нягоднікі бегалі, хацелі быць прэзідэнтамі, крычалі: "Атамную станцыю закрыем!" І ўсё крычалі, што 10 мільярдаў Еўропа нам дасць, а мы гэту атамную станцыю закрыем. І тады я сказаў: "Не, мы яшчэ і другую атамную станцыю пабудуем". А сёння ўсе хочуць пабудаваць: і Польшча, якая Літву падтрымлівала, хоча чатыры энергаблокі пабудаваць, і нават тая ж Літва сёння думае аб тым, каб пабудаваць атамную станцыю. Толькі галаву не трэба губляць і не трэба згортваць супрацоўніцтва са сваімі суседзямі, каб зарабіць грошы на гэту атамную станцыю. Гэта значыць, мы правільна тады зрабілі".

У знешнегандлёвым абароце Расіі Беларусь займае 4-е месца. У кааперацыйных сувязях задзейнічана каля 7 млн расіян, а з сем'ямі - больш за 15 млн чалавек, канстатаваў Аляксандр Лукашэнка.

"Але не толькі і не столькі эканоміка фарміруе братэрскія адносіны. Яны больш багатыя, шматгранныя, яркія. Першаасновай адзінства нашага лёсу выступаюць кроўныя сувязі, культурная спадчына, гістарычная памяць. Мы не проста гаворым на адной мове, мы літаральна разумеем адзін аднаго з паўслова. Гэта вынік тысячагадовай гісторыі нашых народаў. Навошта ж гэта ўсё страчваць?" - падкрэсліў Прэзідэнт.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі