15 снежня, Маскат /Кар. БЕЛТА/. Далейшае паглыбленне беларуска-аманскіх адносін можа стаць новай кропкай росту для абедзвюх эканомік. Аб гэтым гаворыцца ў артыкуле Прэзідэнта Рэспублікі Беларусь Аляксандра Лукашэнкі, які выйшаў на партале Omandaily, паведамляе БЕЛТА.
"Далейшае паглыбленне беларуска-аманскіх адносін можа стаць новай кропкай росту для абедзвюх эканомік і стымулам для развіцця чалавечага капіталу. Аб гэтым сведчаць цяперашні ўзровень палітычных кантактаў і створаны намі зачын. Але ёсць і каласальны нерэалізаваны патэнцыял. Гандлёва-эканамічныя адносіны з'яўляюцца тым трывалым фундаментам, на якім можна пабудаваць будынак двухбаковага супрацоўніцтва любой вышыні", - адзначыў кіраўнік дзяржавы.
У артыкуле расказваецца, што Беларусь можа прапанаваць Аману.
Пра пастаўкі беларускіх тавараў
Перш за ўсё беларускі бок прапануе пастаўкі прадукцыі машынабудавання, хімічнай галіны, прадуктаў харчавання, лёгкай прамысловасці.
"Мы маем перадавыя па сусветных мерках прадпрыемствы нафтахіміі. Біятэхналогіі і фармацэўтыка - у ліку нашых прыярытэтных вектараў развіцця. Прывяду толькі адзін факт: больш за палову лякарстваў у краіне - айчыннай вытворчасці. І гэта доля расце. Беларусь прапануе шэраг унікальных прэпаратаў для лячэння анкалагічных, імунных і сардэчна-сасудзістых захворванняў", - пералічыў кіраўнік дзяржавы.
Пра магчымасці медыцыны
Аляксандр Лукашэнка падкрэсліў, што высокая якасць беларускай медыцыны і перадавыя тэхналогіі лячэння сталі яшчэ адной візітнай карткай краіны. Так, узровень дзіцячай смяротнасці ў Беларусі адзін з самых нізкіх у свеце, а сучасная беларуская транспланталогія - перадавая галіна.
"Да нас з'язджаюцца пацыенты з усіх куткоў Зямлі, нават у самых безнадзейных выпадках. Мы гатовы прадаставіць нашым аманскім сябрам магчымасць лячэння ў высокапрафесійных урачоў, супрацоўніцтва ў сферы падрыхтоўкі медыцынскіх кадраў і абмену лепшымі практыкамі", - запэўніў беларускі лідар.
Пра новыя тэхналогіі
Беларусь таксама можа прапанаваць шырокі спектр напрацовак у кластары новых тэхналогій - ад электробусаў і праграмных рашэнняў для разумных гарадоў да беспілотнікаў, нанаматэрыялаў і спадарожнікаў.
Пра інвестыцыйнае супрацоўніцтва
Беларускія экспарцёры гатовы да сумеснага асваення новых рынкаў у рамках нацыянальнай праграмы Амана па прыцягненні замежных інвестыцый.
"Дзякуючы свайму размяшчэнню Мінск таксама імкнецца ўмацоўваць інвестыцыйнае супрацоўніцтва шляхам прыцягнення прамых замежных інвестыцый высокай якасці для рэалізацыі амбіцыйнай задачы - стаць міжнародным гандлёва-лагістычным і вытворчым хабам. А гэта выдатная магчымасць для аманскіх кампаній, якія шукаюць сферы для інвесціравання ў несыравінныя галіны. Такое партнёрства будзе садзейнічаць развіццю вытворчай базы ў розных сектарах эканомікі і павелічэнню ўкладу экспарту ў ВУП нашых краін", - прапанаваў Аляксандр Лукашэнка.
Пра падрыхтоўку кадраў
Прэзідэнт адзначыў, што ў папярэднія гады Беларусь і Аман эфектыўна супрацоўнічалі ў справе вывучэння арабскай мовы.
"Настаў час пашырыць нашы магчымасці, у тым ліку за кошт падрыхтоўкі на базе беларускіх навучальных устаноў кіраўніцкіх і рабочых кадраў для эканомікі Амана па інжынерна-тэхнічных, медыцынскіх і іншых спецыяльнасцях", - гаворыцца ў артыкуле.
Пра ўзаемныя паездкі і прамы рэйс
На гэты час урады дзвюх краін працуюць над стварэннем максімальна камфортных умоў для паездак. У бліжэйшых планах адкрыццё прамога авіямаршруту паміж дзвюма краінамі.
"Запрашаем у Беларусь бізнесменаў, студэнтаў, турыстаў. Нам ёсць што паказаць!" - адзначыў беларускі лідар.
Пра абавязковасць беларусаў
Аляксандр Лукашэнка ўпэўнены, што партнёры з Амана, як і ўсе, ацэняць абавязковасць беларусаў. "Мы захоўваем цвёрдую прыхільнасць да нашых дамоўленасцей нават у самых цяжкіх умовах. Перакананы, што пазітыўная дынаміка беларуска-аманскіх адносін ужо ў самы бліжэйшы час дасць цудоўныя вынікі, якімі ў поўнай меры змогуць скарыстацца нашы людзі і якія прымножаць дабрабыт будучых пакаленняў", - гаворыцца ў артыкуле.-0-
Падпісвайцеся на нас у
