22 мая, Мінск /Кар. БЕЛТА/. Прэзідэнт Беларусі Аляксандр Лукашэнка падкрэсліў ключавую ролю Старшыні КНР Сі Цзіньпіна ў развіцці беларуска-кітайскага супрацоўніцтва. Аб гэтым Прэзідэнт Беларусі Аляксандр Лукашэнка заявіў на сустрэчы з віцэ-прэм'ерам Дзяржсавета КНР Лю Гачжунам, перадае карэспандэнт БЕЛТА.
"Мы вас у Беларусі вітаем не толькі як высокую службовую асобу, але перш за ўсё як пасланца дружалюбнага нам кітайскага народа, вялікай кітайскай дзяржавы. Вы несяце адказнасць за беларуска-кітайскія адносіны, гэтак жа, як наш віцэ-прэм'ер Снапкоў адказвае за гэты напрамак. Павінен сказаць, што дзякуючы вам мы значна рушылі наперад у нашых адносінах у канкрэтных напрамках. Для пачатку мы сустракаемся з многімі дзяржавамі і падпісваем мемарандумы, пагадненні аб намерах. А з вамі мы ўжо даўно рэалізуем канкрэтныя кантракты. І ў гэтым вялікая заслуга вас і вашых калег", - адзначыў беларускі лідар.
Разам з гэтым Аляксандр Лукашэнка падкрэсліў велізарны асабісты ўклад Сі Цзіньпіна ў развіццё адносін: "Усё сказанае мною ніколькі не прымяншае заслугі старшыні КНР, майго вялікага даўняга сябра Сі Цзіньпіна. Калі б не той паварот з прыходам яго да кіраўніцтва партыяй і дзяржавай, то, напэўна, гэтых дасягненняў не было б і, магчыма, мы з вамі сёння не сустракаліся б".
Віцэ-прэм'ер Дзяржсавета КНР напярэдадні прыбыў з візітам у Беларусь. Ён таксама з'яўляецца сустаршынёй беларуска-кітайскага міжурадавага камітэта па супрацоўніцтве.
У Мінску ўжо адбылося шостае пасяджэнне гэтага камітэта з удзелам першага намесніка прэм'ер-міністра Беларусі Мікалая Снапкова і Лю Гачжуна. Па выніках пасяджэння падпісаны шэраг дакументаў. У іх ліку мемарандум аб узаемаразуменні па ўмацаванні інвестыцыйнага супрацоўніцтва ў сферы лічбавай эканомікі, пратакол камісіі Дзяржаўнага камітэта па навуцы і тэхналогіях і Міністэрства навукі і тэхналогій КНР па вызначэнні флагманскіх праектаў на 2025-2026 гады. У пратаколе пасяджэння міжурадавага камітэта замацаваны намер аб'явіць 2026-2027 гады ў беларуска-кітайскім супрацоўніцтве тэматычнымі гадамі прамысловай кааперацыі.-0-
Падпісвайцеся на нас у
