25 студзеня, Мінск /Кар. БЕЛТА/. Прэзідэнт Беларусі Аляксандр Лукашэнка на пасяджэнні-нарадзе з Нацыянальнай акадэміяй навук назваў умовы для з'яўлення ў краіне новых вучоных, здольных на дасягненні сусветнага маштабу, перадае карэспандэнт БЕЛТА.
Кіраўнік дзяржавы падкрэсліў неабходнасць захавання пераемнасці і пошуку здольнай моладзі ў навуковай сферы: "Важна, каб ланцужок "школа - ВНУ - акадэмічныя інстытуты" працаваў рэальна, канкрэтна і вынікова".
У час размовы з вучонымі Прэзідэнт пацікавіўся, як ідзе працэс пошуку маладых талентаў, ці сочаць за іх поспехамі. "Такіх дзяцей трэба літаральна за руку весці да прафесіі вучонага. Інакш у будучым новыя Алфёравы, Барысевічы і Высоцкія ў нас не з'явяцца, - звярнуў увагу Аляксандр Лукашэнка. - А гэта і ёсць вырашэнне глабальнай праблемы захавання і развіцця навуковых школ. За кожным з вас, паважаныя акадэмікі, члены-карэспандэнты, дактары і прафесары, павінны ісці вучні. Менавіта яны і з'яўляюцца сведчаннем жыццяздольнасці вашых ідэй".
Прэзідэнт таксама закрануў тэму дзіцячага тэхнапарка, якая, паводле яго слоў, неяк адышла ў цень. "Прымаючы рашэнне аб яго стварэнні, мы думалі перш за ўсё аб пераемнасці пакаленняў, фарміраванні ў дзяцей цікавасці да навукі, пачынаючы са школьнай парты. Думаю, што вы мне сёння раскажаце, як дарослая навука ўдзельнічае ў гэтым працэсе", - сказаў кіраўнік дзяржавы.-0-
