29 ліпеня, Слуцкі раён /Кар. БЕЛТА/. Прэзідэнт Беларусі Аляксандр Лукашэнка наведвае з рабочай паездкай Слуцкі раён Мінскай вобласці, перадае карэспандэнт БЕЛТА.
У цэнтры ўвагі кіраўніка дзяржавы будзе сельскагаспадарчая тэматыка, у прыватнасці, пытанні ўборкі ўраджаю збожжавых культур. На прыкладзе работы аграпрамысловага прадпрыемства ААТ "Казловічы-Агра" Прэзідэнту даложаць аб ходзе ўборачнай кампаніі ў цэлым па краіне і ў Мінскай вобласці. Размова пойдзе таксама аб развіцці малочнатаварных комплексаў і новых падыходах да іх будаўніцтва гаспадарчым спосабам. Прэзідэнт наведае адзін з такіх комплексаў - ферму "Лесуны" гаспадаркі "Казловічы-Агра", пабудаваную пераважна за ўласныя сродкі прадпрыемства і ўведзеную ў эксплуатацыю ў пачатку чэрвеня гэтага года. Цяпер на ферме знаходзіцца 10 працэнтаў пагалоўя асноўнага статка пры праектнай магутнасці 800 галоў і з перспектывай павелічэння да 1,5 тыс.
Рабочая паездка кіраўніка дзяржавы стане практычным прадаўжэннем рэспубліканскай селектарнай нарады па ўборцы ўраджаю, якая адбылася ў пачатку гэтага тыдня.
Як паведамлялася БЕЛТА, на селектарнай нарадзе Прэзідэнт даручыў на месцах дакладна вызначыць тэматыку ўборкі, каб забяспечыць максімальны ўраджай і не дапусціць страт. "Вы нават не ўяўляеце, наколькі будзе попыт на прадукцыю сельскай гаспадаркі, у тым ліку і на збожжа. Але мы збожжа на экспарт прадаваць не збіраемся. Нам трэба яго прапусціць праз жывёлагадоўлю, атрымаць малако, мяса і іншае. І гэту прадукцыю прадаць на міжнародных рынках", - заявіў Аляксандр Лукашэнка.
"Паверце, што ў наступным годзе і яшчэ праз год цяперашняе збожжа гэтага года будзе даражэйшым за тыя грошы, якія ёсць сёння. Гэта значыць цана на збожжа і іншыя сельгаспрадукты значна ўзрасце. Таму калі ёсць магчымасць, трэба пакласці на зіму, каб зімой і вясной нашы людзі маглі атрымаць па нармальных цэнах неабходную сельгаспрадукцыю. Стабілізацыйныя фонды. Асабліва ў Мінску і абласных гарадах", - даручыў кіраўнік дзяржавы.-0-
