19 жніўня, Мінск /Кар. БЕЛТА/. Прэзідэнт Беларусі Аляксандр Лукашэнка робіць рабочую паездку ў Брэсцкую вобласць, паведамляе БЕЛТА.
У Пружанскім раёне кіраўнік дзяржавы наведае ААТ "Жураўлінае". Акрамя дакладаў аб ходзе сельгасработ і сацыяльна-эканамічным развіцці рэгіёна, Аляксандр Лукашэнка азнаёміцца з рознымі сартамі і гібрыдамі рапсу, прадукцыяй, што вырабляецца з семя гэтай расліны. У цэнтры ўвагі таксама будзе тэхналогія вырошчвання гэтай культуры, сяўба азімых. Кіраўніку дзяржавы таксама прадставяць узоры айчынных сеялак.
Плануецца, што традыцыйна кіраўнік дзяржавы азнаёміцца і з умовамі эксплуатацыі, утрымання і рамонту сельгастэхнікі.
Аляксандр Лукашэнка неаднаразова падкрэсліваў важнасць рапсу для развіцця сельскай гаспадаркі. Гэта каштоўная алейная і кармавая культура, крыніца высакаякаснага алею і кармавога бялку.
"Рапс - гэта грошы для сялян. Сёння нават у перыяд гэтых шалёных санкцый Еўропа просіць: "Дайце рапсавы алей!" Трэба выходзіць на мільён (тон ураджаю. - Заўвага БЕЛТА). Мы ўжо сёння больш як 700 тыс. (маем. - Заўвага БЕЛТА). Нават з гэтымі пасяўнымі плошчамі, што ў нас ёсць, калі так тэхналагічна гаспадарыць, мы будзем мець мільён", - сказаў Прэзідэнт у чэрвені ў час рабочай паездкі ў Шклоўскі раён.
Напярэдадні ў час рабочай паездкі ў Гродзенскі раён кіраўніку дзяржавы далажылі, што ўраджай семя рапсу ў бягучым годзе складзе каля 800 тыс.т.
За апошні час Аляксандр Лукашэнка зрабіў шэраг рабочых паездак, прысвечаных развіццю сельскай гаспадаркі. Напярэдадні ў Гродзенскай вобласці галоўнай тэмай было садоўніцтва. У Смалявіцкім раёне падрабязна разгледзелі работу вучоных у сферы насенняводства. У Мядзельскім раёне Прэзідэнт азнаёміўся з вопытам стварэння новых гаспадарак на землях, якія не выкарыстоўваюцца, і абсталяваннем машыннага двара пад сучасныя патрабаванні. Яшчэ раней у Слуцкім раёне гучала тэма малочнай жывёлагадоўлі і будаўніцтва малочнатаварных комплексаў. У ходзе наведванняў падрабязна абмяркоўваліся і многія іншыя пытанні сацыяльна-эканамічнага развіцця як у рэгіянальным, так і рэспубліканскім маштабе.-0-
