20 студзеня, Мінск /Кар. БЕЛТА/. Прэзідэнт Беларусі Аляксандр Лукашэнка ў Мінску наведае выстаўку навукова-тэхнічных дасягненняў "Беларусь інтэлектуальная", паведамляе БЕЛТА.
Арганізаваць выстаўку навуковых дасягненняў кіраўнік дзяржавы даручыў у кастрычніку мінулага года на сустрэчы са старшынёй Прэзідыума НАН Беларусі Уладзімірам Гусаковым. "Не толькі для таго, каб зрабілі справаздачу, далажылі аб поспехах, але і як мага больш народу паказаць, што мы можам і што навука ў нас многае можа. На жаль, мы мала прапагандуем не толькі Акадэмію навук, але і дасягненні нашай навукі. Таму трэба прадумаць разам з Адміністрацыяй, урадам, дзе мы можам паказаць людзям, што мы ўмеем рабіць. А паказаць ёсць што", - сказаў беларускі лідар.
Выстаўка пройдзе 20-22 студзеня на базе Нацыянальнага выставачнага цэнтра "БелЭкспа" (Мінск, пр. Пераможцаў, 14). Для наведвальнікаў свабодны ўваход на выстаўку 21-22 студзеня з 10.00 да 17.30.
Свае дасягненні і распрацоўкі прадэманструюць вучоныя НАН Беларусі, прадстаўнікі ўстаноў адукацыі, навукова-даследчых дзяржаўных і прыватных арганізацый краіны, тэхнапаркаў, якія займаюцца навуковымі даследаваннямі. На выстаўцы прадстаўлена больш як 400 экспанатаў. Сярод іх натурныя ўзоры (у тым ліку буйнагабарытная тэхніка), макеты, мультымедыйныя прэзентацыі на вялікіх экранах.
Экспазіцыя навукова-тэхнічных дасягненняў "Беларусь інтэлектуальная" арганізавана па кластарным прынцыпе, які прадугледжвае аб'яднанне і лагічную сувязь буйных тэматычных блокаў, развіваемых у Беларусі і найбольш актуальных цяпер. У ліку кластараў: штучны інтэлект, IT-тэхналогіі, робататэхніка; інавацыйнае прыборабудаванне; электратранспарт і яго базавыя кампаненты, лятальныя апараты; абараназдольнасць і ваенная навука; экалогія, прыродакарыстанне; біятэхналогіі; фармацыя, ахова здароўя, медыцына; аграпрамысловы комплекс, прадукты харчавання; прастора маладзёжных ініцыятыў.
Прадстаўленне экспанатаў акцэнтавана на міждысцыплінарныя і міжгаліновыя ўзаемасувязі "навука - адукацыя - вытворчасць". Спецыяльны акцэнт зроблены на распрацоўках моладзі, у тым ліку прапанаваных у рамках праектаў "100 ідэй для Беларусі" і "100 інавацый маладых вучоных" пад агульным слоганам "Прастора маладзёжных ініцыятыў". Наведвальнікі змогуць убачыць экспазіцыю дасягненняў у галіне сацыягуманітарных навук - найноўшыя кніжныя выданні, археалагічныя артэфакты, вырабы дэкаратыўна-прыкладнога мастацтва, а таксама распрацоўкі ў кантэксце Года гістарычнай памяці.
Мэта мерапрыемства - дэманстрацыя найноўшых навуковых распрацовак беларускіх вучоных і студэнтаў, а таксама прапаганда дасягненняў навукі, арыентаваная на шырокую аўдыторыю.-0-
