ДЗЯРЖОРГАНЫДЗЯРЖОРГАНЫ
Субота, 25 студзеня 2020
Мінск Суцэльная воблачнасць +2°C
Усе навіны
Усе навіны
Прэзідэнт
22 чэрвеня 2016, 18:24

Лукашэнка нацэльвае на амаладжэнне кадравага складу кіраўнікоў

22 чэрвеня, Мінск /Кар. БЕЛТА/. Амаладжэнне кадравага складу кіраўнікоў, стварэнне ўмоў для праяўлення здольнасцей маладога пакалення з'яўляюцца важнейшым напрамкам арганізацыйнай і ідэалагічнай работы Адміністрацыі Прэзідэнта і ўсёй вертыкалі ўлады, заявіў Прэзідэнт Беларусі Аляксандр Лукашэнка сёння на V Усебеларускім народным сходзе, перадае карэспандэнт БЕЛТА.

"Матываваная, адукаваная, актыўная моладзь - гэта, па сутнасці, стратэгічны рэсурс развіцця краіны, любой краіны. Паколькі ад таго, якую змену мы выхаваем, наколькі падрыхтуем да самастойнага жыцця, залежыць будучае дзяржавы, прагрэс або дэградацыя грамадства", - адзначыў Аляксандр Лукашэнка.

Паводле яго слоў, рэалізацыя гэтага прыярытэту прадугледжвае адукацыю і прафесійнае станаўленне моладзі, фарміраванне канструктыўнай грамадзянскай пазіцыі, выхаванне патрыятызму і ўключэнне ў канкрэтныя справы па ўмацаванні дзяржавы, абароне яе рубяжоў, забеспячэнні спакою і парадку ў грамадстве.

"Неабходна прадоўжыць работу па ўдасканаленні сістэмы падтрымкі адоранай, таленавітай і з лідарскімі якасцямі моладзі, раскрыцці яе творчага патэнцыялу", - лічыць Прэзідэнт.

Асаблівым напрамкам маладзёжнай палітыкі, паводле яго слоў, стане актыўнае ўключэнне студэнтаў у навуку. "Мэта - сфарміраваць новае пакаленне даследчыкаў", - растлумачыў Аляксандр Лукашэнка.

На думку кіраўніка дзяржавы, вялікую ўвагу трэба ўдзяліць фарміраванню павагі сямейных каштоўнасцей. "Падтрымка маладых сем'яў заўсёды была і застанецца адным з галоўных клопатаў дзяржавы. Бо калі моладзь мае добрыя бытавыя ўмовы, яна імкнецца стварыць сваю сям'ю, мець дзяцей, а значыць, узрастае гарантыя яе замацавання на месцах", - сказаў Прэзідэнт.

Аляксандр Лукашэнка лічыць, што органам дзяржкіравання, буйным прадпрыемствам, бізнесу неабходна актыўна ўключацца ў адбор і падтрыманне таленавітых маладых людзей. "Выхоўваць кадры пачынаючы з ВНУ, а тое і са школы, прапаноўваць навучальныя праграмы, стажыроўкі і практыку на прадпрыемствах. Старацца зацікавіць чалавека прафесіяй. Гэта дасць магчымасць выхаваць дастойную змену і забяспечыць упэўненую будучыню краіны", - растлумачыў ён.

Паводле слоў Прэзідэнта, далейшае развіццё атрымаюць валанцёрскі і студатрадаўскі рухі. Цэнтральную ролю ў гэтай маштабнай рабоце павінна адыграць вядучая маладзёжная арганізацыя - Беларускі рэспубліканскі саюз моладзі.

"Не магу не адзначыць важную ролю моладзі як самай актыўнай і творчай часткі грамадства. Менавіта ёй трэба будзе вырашаць асноўныя задачы сацыяльна-эканамічнага развіцця Беларусі ў перспектыве. Таму важнейшая мэта - сфарміраваць ініцыятыўнае, працавітае, адукаванае і культурнае пакаленне, адказнае за свой лёс і лёс сваёй Радзімы", - адзначыў Аляксандр Лукашэнка.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі