Лукашэнка: нам вайны не трэба, наша шчасце ў мірным жыцці

18 снежня, Мінск /Кар. БЕЛТА/. Беларусам вайна не патрэбна, наша шчасце ў мірным жыцці. Аб гэтым Прэзідэнт Беларусі Аляксандр Лукашэнка заявіў у Пасланні беларускаму народу і парламенту, перадае карэспандэнт БЕЛТА.

"Мы робім усё для таго, каб не дапусціць вайны. Мы ўжо наеліся гэтай вайны. Яшчэ пакаленне не памерла тое, якое ваявала. Нам вайна не патрэбна. Наша шчасце ў мірным жыцці. Мы не хочам больш сядзець у балотах і зямлянках. А каб гэтага не здарылася, трэба быць моцнымі, - падкрэсліў Аляксандр Лукашэнка. - Свет сёння такі, ён быў заўсёды такім: моцных заўсёды і ўсюды паважалі. Таму мы павінны быць моцнымі".

Аляксандр Лукашэнка адзначыў, што санкцыі супраць Беларусі ўводзіліся зусім не з-за "дыктатуры". Ва ўсходніх краінах, звярнуў ён увагу, далёка не дэмакратычныя рэжымы, але Захаду выгадна сябраваць з імі. І грошы там ліюцца ракой.

"Цяпер ідзе барацьба, канкурэнцыя жудасная. Усе разумеюць, што эканоміка перш за ўсё. І ў гэтай канкурэнцыі пачалося бязлітаснае ўдушэнне сваіх канкурэнтаў. Калі не са зброяй (ну як супраць беларусаў ваяваць або супраць расіян, гэта ж ваяваць супраць галоўнага ядзернага цэнтра), то пачалі душыць санкцыямі. І нешта там па дробязях: танкер узарвалі з нафтай, яшчэ нанеслі ўдар. Як слана камар укусіў: так, непрыемна, так, стратна, але перажывём. А перш, чым ты танкер узарвеш з расійскай нафтай, ты падумай, што будзе потым, - сказаў Прэзідэнт. - Таму цяжкая сітуацыя на сённяшні дзень, але мы павінны выстаяць".

Кіраўнік дзяржавы нагадаў, як супраць Беларусі ўводзіліся санкцыі пасля сітуацыі з пасадкай самалёта Ryanair. "Я што толькі ні рабіў, каб растлумачыць: хлопцы, самалёт у Вільнюс ляцеў, над Вільнюсам быў. Саджайце яго ў Вільнюсе. Была пагроза ўзрыву. Навошта вы развярнуліся з Вільнюса і пачалі саджаць гэты самалёт у Беларусі, - адзначыў абсурднасць сітуацыі Аляксандр Лукашэнка.

На борце гэтага самалёта быў Раман Пратасевіч, як высветлілася зусім нядаўна - працуючы на беларускія спецслужбы. Таму, каб не раскрываць свайго агента, уладам давялося затрымліваць яго як сапраўднага злачынца. "Вось у чым быў сэнс аперацыі. Увялі санкцыі - дык вы цяпер папрасіце прабачэння і адмяніце іх", - заклікаў Прэзідэнт.

Аляксандр Лукашэнка таксама звярнуў увагу на актыўную мілітарызацыю еўрапейскіх краін. Так, Брусель выдзеліў Польшчы фінансавую дапамогу ў памеры 44 млрд еўра для закупак узбраення і ваеннай тэхнікі. Плюс да гэтага $11 млрд дабавілі ЗША. Для краін Балтыі Еўракамісіяй адобраны мэтавы крэдыт на суму амаль 15 млрд еўра.