Лукашэнка на прыкладзе сітуацыі з бульбай растлумачыў, як і што чыноўнікі павінны трымаць на кантролі

12 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка на прыкладзе сітуацыі з бульбай растлумачыў, як і што чыноўнікі павінны трымаць на кантролі і аператыўна рэагаваць на тыя ці іншыя тэндэнцыі. Адпаведныя заявы кіраўнік дзяржавы зрабіў на нарадзе з кіраўніцтвам Адміністрацыі Прэзідэнта, перадае карэспандэнт БЕЛТА.

Службовых асоб у цэлым, асабліва Адміністрацыю Прэзідэнта, кіраўнік дзяржавы настройвае на аператыўныя і, галоўнае, больш самастойныя дзеянні. "У нас што не праблема - хутчэй да Прэзідэнта. Што вы да мяне бегаеце? Вы ведаеце маю пазіцыю. Не трэба крыўдзіць людзей, хто б яны ні былі, калі яны законна працуюць, - сказаў ён. - Калі мы бачым, што нешта не так, - трэба закон паправіць. Калі парушаюць - няхай адказваюць. Таму ўсё павінна быць кантралюема".

Адна з нашумелых апошнім часам тэм - нібыта недахоп бульбы на прылаўках магазінаў. Недзе аб'ектыўна, а недзе былі і відавочна абуральныя факты, калі ігракі на рынку спрабавалі стварыць штучны дэфіцыт. Аляксандр Лукашэнка гаварыў аб гэтым раней і зноў вярнуўся да пытання на нарадзе, падкрэсліўшы на гэтым прыкладзе, што павінна быць у полі зроку чыноўнікаў у плане кантролю. А яшчэ - контрпрапаганды, бо апаненты часта спецыяльна раскручваюць тую ці іншую тэму. "З гэтым трэба навучыцца працаваць. Гэта і ёсць контрпрапаганда, як раней гаварылі. І для нас яна вельмі-вельмі выгадная. Я прыводзіў прыклад нядаўна па гандлі, - расказаў кіраўнік дзяржавы. - Пачалі жартаваць з гэтай бульбай. Я здымаю трубку: "Герасімаў (старшыня КДК. - Заўвага БЕЛТА), разбярыся і далажы! Разам з былым прэм'ерам. Галавой адкажаце". Пачалі разбірацца - з вялікімі сеткамі. Прыходзіць, а там бульбы - дзяваць няма куды. Яна ў іх ляжыць на складзе. Чаму не на прылаўку? Палітыка. Трэба паказаць, што вось улады задушылі цэнамі да такой ступені, што жыць далей немагчыма. Інакш кажучы, наступілі на балючае месца гэтым гандлярам".

"Як заехалі - бульба з'явілася. Я не гавару, што мы ўжо там па ўсёй краіне забяспечылі бульбай. Забяспечылі. І імпартная. Вядома, гэта ганебна. Але гэта я з губернатарамі разбяруся і з вамі таксама. Ды справа не толькі ў бульбе", - падкрэсліў беларускі лідар.

Прэзідэнт звярнуў увагу, што цана на прылаўках на тую ці іншую прадукцыю часам магла быць у два-тры разы накручана ў параўнанні з цаной тавару ў вытворцы. А розніцу атрымлівалі розныя пасрэднікі і гандаль. "Я як рэальны эканаміст зямны ўяўляю, як гэта ўсё складваецца. І ўсе рынуліся ў гандаль. Таму што там можна зарабіць. А як? Узяў крэдыт. Гэта што, яго грошы ў банку? Гэта нашы грошы, народныя. Ён узяў там крэдыт. За кошт шалёнага бескантрольнага павышэння цэн ён гэты крэдыт за 3-4 гады вярнуў. Усё, чысты прыбытак атрымлівае, адпачывае - заснавальнік Жыве за кошт чаго? За кошт павышэння цэн - бескантрольна. Гэта што, нармальна? Гэта ненармальна. Гэта амерыканская схема,падкінутая нам. Але там яна выпакутавана. Прычым у іх рэзерв ёсць - друкуюць долары. Ім гэта можна. Нам - недапушчальна".

"Але галоўнае - людзі гэта не ўспрымаюць. І справядліва", - падкрэсліў беларускі лідар.

Аляксандр Лукашэнка звярнуў увагу, што ў той жа час работнікі ў гэтых гандлёвых сетках - касіры, грузчыкі і іншыя - атрымлівалі зусім невялікія зарплаты, а асноўныя сродкі ішлі на "зарплату" заснавальнікам. "У месяц Br78 тыс. У месяц! Слухайце, я марыць толькі як Прэзідэнт магу пра такую зарплату. І не будзе ніколі ў мяне такой зарплаты".

Кіраўнік дзяржавы падзяліўся і некаторымі іншымі падрабязнасцямі, звязанымі з рахункамі ў банках: "Як быццам вы не бачыце. У пяці банках адкрывае рахункі і туды яму пералічваюць, у пяць банкаў, матэрыяльную дапамогу - па Br56 тыс.".

"Як я павінен на гэта рэагаваць? Я ж публічна сказаў: "Гэта несправядліва, гэта недапушчальна!" І людзі напэўна гэта разумеюцьі падтрымліваюць, - сказаў Аляксандр Лукашэнка. - У той жа час вырашылі абысці. Ну нічога, наручнікі дасталі, на стол паклалі перад некаторымі. Так будзе - жорстка. Але гэта павінны рабіць вы, а не я".-0-