05 ліпеня 2025, 12:41

Лукашэнка: лепш пад мірным светлым небам змагацца за гістарычную праўду

Аляксандр Лукашэнка

5 ліпеня, Магілёў /Кар. БЕЛТА/. Лепш пад мірным светлым небам змагацца за гістарычную праўду, чым ваяваць. Аб гэтым Прэзідэнт Беларусі Аляксандр Лукашэнка заявіў на адкрыцці музея Славы Магілёўшчыны, перадае карэспандэнт БЕЛТА.

Прэзідэнт падкрэсліў важнасць захавання гістарычнай праўды: "Цяпер ідзе барацьба за галовы, за розумы нашых людзей. Прайграем гэту барацьбу - час наш будзе злічаны. Таму мы ўчапіліся ў гэту гістарычную памяць. І наогул, подзвіг нашага савецкага народа, у тым ліку на беларускай зямлі, - гэта гонар для любога народа. Ні адзін народ ад гэтага не адмовіўся б".

"Лепш пад мірным светлым небам змагацца за наша мінулае. Для чаго? У імя будучыні. Лепш пад мірным небам жыць, чым ваяваць", - сказаў Аляксандр Лукашэнка.

Гаворачы пра гістарычную праўду, Аляксандр Лукашэнка адзначыў, што трэба памятаць і аб праліках, дапушчаных у пачатку вайны: "Я вельмі прасіў бы ўсіх вас, асабліва супрацоўнікаў музея: нам патрэбна праўда, нам патрэбна цяпер справядлівасць! Не трэба нічога ўтойваць. Не трэба ўтойваць, як мы "прашлёпалі" пачатак вайны. Як Беларусь проста на працягу пары месяцаў апынулася пад акупацыяй".

Паводле слоў Прэзідэнта, тады гэта здарылася не таму, што савецкія воіны былі горшыя за нямецкіх. "Мы аказаліся ў нейкай ступені не гатовыя да гэтай вайны. Мы разлічвалі на мір з боку фашыстаў: "Вось, не нападуць, дагавор аб ненападзенні і іншае...", - нагадаў Аляксандр Лукашэнка.

Кіраўнік дзяржавы падкрэслівае, што з гэтых урокаў мінулага трэба рабіць высновы і заўсёды быць гатовымі абараніць краіну. "Так, мы ні на каго не нападаем. Будзем супакойваць любога. Будзем перасцерагаць ад вайны. Але кожны дзень мы павінны рыхтавацца да гэтай вайны, каб яна не здарылася зноў на нашай зямлі. І каб нечакана ноччу або ў 4 раніцы на нас не напалі і мы не аказаліся негатовымі да абароны, - заявіў ён. - Я гэта гавару для таго, каб і гэту праўду мы гаварылі. Яна была".-0-