17 чэрвеня, Бабруйск /Кар. БЕЛТА/. Прэзідэнт Беларусі Аляксандр Лукашэнка ў час сустрэчы з работнікамі ААТ "Белшына" ў Бабруйску выказаўся аб дэмаграфічнай сітуацыі ў краіне і расказаў аб сваім стаўленні да новага свята - Дня бацькі, перадае карэспандэнт БЕЛТА.
Адно з пытанняў кіраўніку дзяржавы датычылася яго стаўлення да новага свята і традыцый, якімі, на думку Прэзідэнта, яго варта напоўніць. Цікава, што задаваў пытанне супрацоўнік "Белшыны" Валерый Салавянчык - бацька семярых дзяцей.
Аляксандр Лукашэнка расказаў, што з радасцю згадзіўся на прапанову, якая была агучана ў час звароту Прэзідэнта з пасланнем да народа і парламента, - заснаваць у Беларусі Дзень бацькі. Таму што свят, прысвечаных ролі жанчын, маці шмат, а вось мужчыны, бацькі былі неяк незаслужана абдзелены ў гэтым сэнсе. "Міжнародны жаночы дзень, маці ўзнагароджваем... Слухайце, нібыта дзеці ў жанчын нарадзіліся без нас, нібыта мы нічога і не рабілі. Таму трэба было неяк замацаваць, што і мы чагосьці з гэтымі дзецьмі рабілі, мы іх гадуем, кормім, адказваем за іх у цэлым", - сказаў Прэзідэнт.
Кіраўнік дзяржавы адзначыў, што зыходзячы з дэмаграфічных паказчыкаў у краіне для росту колькасці насельніцтва трэба значна павялічыць нараджальнасць. А гэта азначае, што кожная беларуская сям'я павінна арыентавацца на тое, каб мець як мінімум трое дзяцей: "Для нас колькасць дзяцей - галоўная праблема, не вашы шыны. Нам трэба спачатку, каб было хаця б трое ў кожнай сям'і. Тады будзе прырост".
"Калі ў нас у кожнага будзе хаця б пяцёра дзяцей, квітнеючай будзе краіна", - сказаў кіраўнік дзяржавы.-0-
