9 лютага, Мінск /Кар. БЕЛТА/. Сектар IT-тэхналогій у Беларусі не разваліўся пасля ад'езду некаторых айцішнікаў, а наадварот, рухаецца наперад. Аб гэтым Прэзідэнт Беларусі Аляксандр Лукашэнка заявіў на сустрэчы з беларускімі вучонымі, перадае карэспандэнт БЕЛТА.
Гаворачы аб развіцці ў краіне IT-тэхналогій, кіраўнік дзяржавы прыгадаў аб стварэнні Парка высокіх тэхналогій і адзначыў, што не так даўно "пэўныя людзі пабеглі за мяжу". "Я іх не асуджаю. Таму што амерыканцы і іншыя білі па IT-сектары, каб нас прытармазіць, увялі санкцыі. Ну куды ім дзявацца (беларускім айцішнікам ва ўмовах санкцый. - Заўвага БЕЛТА)? Хтосьці выехаў, хтосьці вярнуўся, - адзначыў Прэзідэнт. - Хтосьці паездзіў па свеце (і вырашыў. - Заўвага БЕЛТА) - не, толькі ў Беларусь. У беларусаў гэта асаблівасць: мала хто можа быць за мяжой і быць задаволеным".
"Вось паехалі - ну не разваліўся ж IT-сектар у эканоміцы, прамысловасці, сельскай гаспадарцы. Наадварот - рухаецца. Тыя, хто паехаў... Іх месца займаюць іншыя", - прадоўжыў беларускі лідар.
Аляксандр Лукашэнка падкрэсліў, што акрамя ПВТ IT-тэхналогіі добра развіты на многіх вялікіх айчынных прадпрыемствах, у Акадэміі навук. Прычым яны ствараюць паўнацэнны гатовы прадукт, а не частку праграмнага забеспячэння замежных кампаній.-Э-
