17 лістапада, Мінск /Кар. БЕЛТА/. Тэлефонная размова Прэзідэнта Беларусі Аляксандра Лукашэнкі з в.а. канцлера Германіі Ангелай Меркель, як і было дамоўлена раней, адбылася сёння. Аб гэтым БЕЛТА паведамілі ў прэс-службе Прэзідэнта Беларусі.
"Датычылася размова, як вядома, сітуацыі на граніцы Беларусі з краінамі Еўрапейскага саюза. Падрабязна абмеркаваўшы праблему бежанцаў, бакі прыйшлі да пэўнага разумення, як дзейнічаць і рухацца далей у вырашэнні існуючых пытанняў. Дамовіліся Прэзідэнт Беларусі і в.а. канцлера Германіі аб тым, што праблема ў цэлым выносіцца на ўзровень Беларусі і ЕС, пры гэтым адпаведныя службовыя асобы, якія будуць вызначаны ад абодвух бакоў, неадкладна ўступяць у перагаворы ў мэтах вырашэння існуючых праблем. У гэтым жа кантэксце будзе вырашацца пажаданне бежанцаў папасці ў Германію", - расказалі ў прэс-службе.
Таксама ў размове з в.а. канцлера Германіі да Прэзідэнта Беларусі была даведзена просьба старшыні Еўрапейскай камісіі Урсулы фон дэр Ляен аб абавязковым удзеле ў працэсе міжнародных арганізацый, што займаюцца праблематыкай бежанцаў і мігрантаў, якія ўжо актыўна супрацоўнічаюць з беларускім бокам.
Дамовіліся Аляксандр Лукашэнка і Ангела Меркель і аб кантактах у далейшым.
Як паведамлялася БЕЛТА, папярэдняя размова Аляксандра Лукашэнкі і Ангелы Меркель адбылася ўвечары 15 лістапада і доўжылася каля 50 мінут. На наступны дзень кіраўнік беларускай дзяржавы на нарадзе па абстаноўцы на Дзяржаўнай граніцы раскрыў дэталі гэтай размовы.
Абмяркоўвалася праблематыка вакол бежанцаў і эскалацыі абстаноўкі на дзяржграніцы. "Мы сышліся на думцы, што эскалацыя нікому не патрэбна - ні Еўрапейскаму саюзу, ні Беларусі. І дапусціць эскалацыі, як бы камусьці гэтага ні хацелася, аж да гарачага сутыкнення, мы не можам", - адзначыў беларускі лідар.
Другое пытанне, якое 15 лістапада абмяркоўвалі лідары краін, - прыток бежанцаў. "У нас, вядома, розныя на гэта погляды. Што ў Еўрапейскім саюзе, што ў Беларусі, погляды розныя. Вельмі яны заклапочаны прытокам бежанцаў у Беларусь, - расказаў Аляксандр Лукашэнка. - Але яны абсалютна не ведаюць, што не мы іх сюды клічам, і не ведаюць, што каля 5 тыс. на сённяшні дзень - гэта людзі, якіх мы за восень вярнулі назад. Інакш кажучы, мы не збіраем па ўсім свеце бежанцаў і не прывозім у Беларусь, як Польшча праінфармавала Еўрапейскі саюз".
Трэцяе пытанне датычылася лагера бежанцаў на беларуска-польскай граніцы. "Праблема, як я сказаў Меркель, у тым, што калі мы не выратуем гэтых людзей, мы будзем бітыя: і Беларусь, а тым больш ЕС, які не прапусціў гэтых бежанцаў. Таму з гэтымі людзьмі трэба неадкладна нешта вырашаць, - сказаў Прэзідэнт.- У сувязі з гэтым я ўнёс прапанову ў цэлым па развязцы сітуацыі. Не буду яе цяпер канкрэтызаваць. Мы дамовіліся з Меркель, што мы не будзем пакуль аб гэтым гаварыць канкрэтна. Яна папрасіла час, паўзу для таго, каб абмеркаваць гэту прапанову з членамі ЕС".
Акрамя таго, у час папярэдняй тэлефоннай размовы абмяркоўвалася пытанне даступнасці для бежанцаў гуманітарнай дапамогі. Кіраўнік дзяржавы абверг інфармацыю, якая распаўсюджваецца польскім бокам, што Беларусь нібыта блакіруе іх пастаўкі гуманітарнай дапамогі для бежанцаў: "Польшча вось быццам бы хацела, але яе не пускаюць. На што я заўважыў: "Якія праблемы могуць быць у палякаў, каб перадаць гуманітарную дапамогу? Калі хочаце ўстараніць калючы дрот, мы не супраць - устараняйце і пад'язджайце непасрэдна да бежанцаў. Ніякіх перашкод тут няма і быць не можа. Таму гэта проста хлусня, фэйк".
Больш таго, Беларусь праявіла максімальную адкрытасць у сітуацыі, што склалася: на граніцы свабодна працуюць розныя СМІ, у тым ліку замежныя, да бежанцаў маюць доступ прадстаўнікі міжнародных арганізацый.
Кантакты для вырашэння міграцыйнага крызісу падтрымліваюцца і на іншых узроўнях. Так, напярэдадні адбылася чарговая тэлефонная размова міністра замежных спраў Беларусі Уладзіміра Макея з намеснікам старшыні Еўрапейскай камісіі, высокім прадстаўніком Еўрапейскага саюза па замежных справах і палітыцы бяспекі Жазэпам Барэлем
