14 кастрычніка, Мінск /Кар. БЕЛТА/. Сустрэчы гарадоў-пабрацімаў уносяць важкую лепту ў нарошчванне стратэгічнага партнёрства ў рамках Саюзнай дзяржавы, актывізацыю дзелавых і чалавечых кантактаў. Аб гэтым гаворыцца ў прывітанні Прэзідэнта Беларусі Аляксандра Лукашэнкі ўдзельнікам 11-й сустрэчы гарадоў-пабрацімаў Беларусі і Расіі ў Пскове. Прывітанне агучыў намеснік старшыні Мінскага аблвыканкама, намеснік старшыні Беларускай грамадскай арганізацыі "Пародненыя гарады" Іван Маркевіч, перадае карэспандэнт БЕЛТА.
"Шмат у чым дзякуючы прадметнаму ўдзелу пародненых гарадоў рэалізуюцца сумесныя праекты, вызначаюцца новыя актуальныя прыярытэты, распрацоўваюцца праграмы, накіраваныя на пашырэнне гаспадарчых сувязей, далейшую інтэграцыю і павышэнне дабрабыту насельніцтва", - гаворыцца ў прывітанні.
"Сённяшняя сустрэча праходзіць на фоне вельмі напружанай міжнароднай абстаноўкі, росту нестабільнасці ў свеце і асобных рэгіёнах. У гэтай сітуацыі як ніколі важна захоўваць і ўмацоўваць вузы дружбы, развіваць узаемадзеянне па ўсіх напрамках, сумеснымі намаганнямі ажыццяўляць бяспеку на нашай зямлі", - адзначаецца ў дакуменце.
Прэзідэнт Беларусі пажадаў удзельнікам мерапрыемства паспяховай работы, удачы ва ўсіх справах і пачынаннях, новых здзяйсненняў у імя працвітання беларускага і расійскага народаў.
На сустрэчу ў Пскове сабраліся прадстаўнікі амаль 60 гарадоў Беларусі і Расіі. У час пленарнага пасяджэння і работы па секцыях размова будзе весціся аб умацаванні двухбаковага супрацоўніцтва, у тым ліку ў галіне эканомікі, сацыяльнай сферы, культуры і адукацыі.-0-
