30 кастрычніка, Мінск /Уладзімір Мацвееў - БЕЛТА/. Прэзідэнт Беларусі Аляксандр Лукашэнка пацвярджае дружалюбны і партнёрскі характар беларуска-армянскіх адносін. Аб гэтым ён заявіў сёння на сустрэчы з Прэзідэнтам Арменіі Арменам Саркісянам, перадае карэспандэнт БЕЛТА.
"Нягледзячы на розныя разважанні ў дэмакратычнай Арменіі, у Беларусі вы заўсёды мелі і будзеце мець добрых і надзейных сяброў. Мы з вамі працуем і ў адзінай эканамічнай прасторы - нашым Еўразійскім саюзе. У ваенна-палітычным саюзе АДКБ. І як бы там ні гаварылі, ні пісалі, мы свята выконваем нашы дамоўленасці. Усё, што пакладзена ў рамкі гэтых арганізацый", - заявіў кіраўнік дзяржавы.
Ён адзначыў, што Беларусь у гэтыя дні прымае буйны міжнародны форум - сустрэчу Асноўнай групы Мюнхенскай канферэнцыі па бяспецы. "Пытанне вельмі важнае і сур'ёзнае. І ваш прыезд у Мінск, удзел у пасяджэннях гэтай групы па такой тэматыцы сведчыць аб тым, што Арменію не проста хвалюе гэта праблема. Гэта - актуальная праблема для армянскага народа", - сказаў Прэзідэнт Беларусі.
Што датычыцца гандлёва-эканамічнага супрацоўніцтва, кіраўнік беларускай дзяржавы назваў яго асновай двухбаковых адносін з Арменіяй. "Тавараабарот расце. Мы пераадолелі спад. У мінулым годзе больш за 30 працэнтаў прырост. Гэта недзе $45 млн (узаемны тавараабарот. - Заўвага БЕЛТА), - канстатаваў ён. - Калі параўноўваць з тым, што наогул нічога не было некалькі гадоў таму, то гэта вынік. Але калі гаварыць аб нашым патэнцыяле, то вядома, гэта не тавараабарот".
"Мы сёння свабодна маглі б мець $150 млн тавараабарот, і гэта значна ўзняло б нашы адносіны на больш высокі ўзровень. Вы ведаеце нашы магчымасці, мы ведаем вашы. Таму любыя прапановы, якія будуць вылучаны Арменіяй, мы разгледзім у кароткія тэрміны і прымем адпаведнае рашэнне", - запэўніў беларускі лідар.
Ён дадаў, што Арменія цяпер перажывае чарговыя складаныя дэмакратычныя перамены. "Нікуды ад гэтага не дзецца. І, вядома, атрымаць інфармацыю з першых вуснаў ад свайго сябра і калегі для мяне вельмі важна".
Прэзідэнт падзякаваў свайму калегу за падтрымку групы беларускіх журналістаў, якія ў свой час былі накіраваны ў Арменію для аб'ектыўнага асвятлення падзей, якія там адбываюцца. "Мы хочам ведаць, што адбываецца ў дружалюбнай нам Арменіі. Я вам за гэта вельмі ўдзячны. Вы нават інтэрв'ю далі нашым журналістам. Вельмі шырока яно разышлося ў Беларусі і не толькі. Мы зразумелі, што адбываецца ў Арменіі. І гэта вельмі важна для нашага народа. Таму мы ў вашай асобе бачым таго чалавека, які аб'ектыўны і гатовы падтрымліваць з Беларуссю адносіны. Мы адкажам узаемнасцю", - падкрэсліў кіраўнік дзяржавы.
Як стала вядома па выніках сустрэчы, прэзідэнты абмеркавалі розныя аспекты двухбаковых адносін, абстаноўку ў свеце. Асабліва была падкрэслена роля мінскай пляцоўкі, якая вызначаецца стабільнасцю і прадказальнасцю, дзе рэгулярна вырашаюцца розныя міжнародныя праблемы. Адзін з прыкладаў - Мінская група АБСЕ, якая займаецца пошукам шляхоў мірнага ўрэгулявання карабахскага канфлікту.
Армен Саркісян таксама адзначыў высокі аўтарытэт беларускага лідара, які, як і Беларусь у цэлым, карыстаецца павагай і даверам.
У ліку цікавых напрамкаў для развіцця двухбаковага супрацоўніцтва Прэзідэнт Арменіі назваў сферу новых тэхналогій, уключаючы навуку, ІТ, электронныя тэхналогіі. Яшчэ адзін перспектыўны напрамак - гэта харчовая прамысловасць, дзе бакі могуць не толькі ўзаемадзейнічаць паміж сабой, але выходзіць з вырабленай прадукцыяй на рынкі іншых краін.
На сустрэчы былі адзначаны і даўнія сувязі народаў дзвюх краін, агульная гісторыя. Адзін з яе элементаў - маладзёжны камсамольскі рух, 100-годдзе якога цяпер адзначаецца. "У гэтыя дні ў нас праходзяць масавыя мерапрыемствы, звязаныя са 100-годдзем камсамола. Вы правільна сказалі - гэта наша гісторыя, нам ад яе нікуды не адысці, нікуды не дзецца", - сказаў Аляксандр Лукашэнка.
Супрацоўніцтва Беларусі і Арменіі мае дружалюбны характар, арганізавана ўзаемадзеянне ў рамках СНД, ЕАЭС і АДКБ. 11 чэрвеня 2018 года краіны адзначылі 25-годдзе ўстанаўлення дыпламатычных адносін. Супрацоўніцтва на міжнароднай арэне мае канструктыўны характар. Беларусь і Арменія аказваюць узаемную падтрымку па ключавых для абедзвюх краін пытаннях і пры вылучэнні у выбарныя органы сістэмы ААН.
У 2017 годзе тавараабарот склаўся ў аб'ёме $42,7 млн (132,9 працэнта да ўзроўню 2016 года), экспарт - $34,5 млн (156,8 працэнта), імпарт - $8,2 млн (80,9 працэнта). Сальда дадатнае ў суме $26,3 млн.
У студзені-жніўні 2018 года тавараабарот паміж Беларуссю і Арменіяй склаў $31 млн і ў параўнанні з аналагічным перыядам 2017 года ўзрос на 33,7 працэнта, экспарт - $23,6 млн (павялічыўся на 29,2 працэнта), імпарт - $7,4 млн (павялічыўся на 50,4 працэнта). Сальда дадатнае ў памеры $16,2 млн.
Аснову беларускага экспарту ў студзені-жніўні склалі малако і згушчаныя вяршкі, трактары і седлавыя цягачы, ялавічына, сметанковае масла, шыны, папера і кардон, мэбля. З Арменіі імпартавалі моцныя спіртныя напіткі, спецыфічныя тавары, лекавыя сродкі. У Арменіі дзейнічаюць прадстаўніцтвы, даччыныя прадпрыемствы, суб'екты тавараправоднай сеткі і дыстрыб'ютары больш як 80 беларускіх прадпрыемстваў. Функцыянуюць тры прадпрыемствы з удзелам беларускага капіталу: ТАА "Армяна-Беларускі гандлёвы дом "Ар-Бе", ТАА "БелАЗ Каўказ Транс Сэрвіс" і ЗАТ "Гандлёвы дом "БелАр".
У Беларусі дзейнічае 57 прадпрыемстваў з армянскім капіталам, у тым ліку 17 сумесных і 40 замежных арганізацый.-0-
