4 кастрычніка, Мінск /Кар. БЕЛТА/. Кіраўнік дзяржавы Аляксандр Лукашэнка даручыў праінфармаваць у Беларусі шырокую грамадскасць аб існуючай ваенна-палітычнай абстаноўцы. Аб гэтым дзяржаўны сакратар Савета бяспекі Аляксандр Вальфовіч расказаў журналістам па выніках праведзенай з удзелам Прэзідэнта нарады па пытаннях ваеннай бяспекі, перадае карэспандэнт БЕЛТА.
Дзяржсакратар адзначыў, што такія нарады праводзяцца ўжо на сістэмнай аснове, паколькі Аляксандр Лукашэнка трымае на пастаянным кантролі ацэнку абстаноўкі, якая складваецца сёння вакол Беларусі.
"Ваенна-палітычная абстаноўка сапраўды сёння мае тэндэнцыю да павышэння напружанасці. І кіраўнік дзяржавы гэтыя пытанні трымае на асабістым кантролі, пастаянна цікавіцца. Па-першае, як ацэньваюць ваенныя гэту абстаноўку, якія меры мы выпрацоўваем, якія меры стратэгічнага стрымлівання, і што мы прадугледжваем для абароны сваёй краіны, насельніцтва, нацыянальных інтарэсаў", - сказаў Аляксандр Вальфовіч.
Паводле яго слоў, Прэзідэнт паставіў задачу давесці інфармацыю аб існуючай абстаноўцы да шырокай грамадскасці, насельніцтва краіны. "Народ Беларусі павінен сёння разумець, што сёння адбываецца і чаму такія меры прымаюцца, і якія пагрозы зыходзяць. Таму Прэзідэнтам пастаўлена задача праінфармаваць насельніцтва Беларусі аб рэальнай ваенна-палітычнай абстаноўцы. У вялікіх калектывах, на прадпрыемствах, у ведамствах. Для таго, каб народ Беларусі разумеў і ацэньваў гэту абстаноўку, цаніў тое, што сёння робіцца ў Беларусі для абароны нашага насельніцтва", - адзначыў дзяржаўны сакратар Савета бяспекі.
Ён звярнуў увагу, што ўжо даўно ў адносінах да Беларусі развязана інфармацыйная вайна, адным са сродкаў якой з'яўляюцца фэйкі. З іх дапамогай спрабуюць падагрэць грамадства і справакаваць яго на пэўныя дзеянні з мэтай падарваць спакойную абстаноўку ў дзяржаве.
Адной з тэм, што мусіруюцца апошнім часам, стала тэма мабілізацыі на фоне праводзімых у Расіі адпаведных мерапрыемстваў. "Прэзідэнт дакладна і выразна сказаў, што ніякай мабілізацыі ў Беларусі не прадугледжваецца. А комплекс мабілізацыйных мерапрыемстваў пачаўся не сёння і не ўчора, а праводзіцца на працягу існавання Узброеных Сіл суверэннай Беларусі. Гэта нармальная мабілізацыйная падрыхтоўка - комплекс зборавых мерапрыемстваў, які дае магчымасць рыхтаваць ваенна-абучаны рэзерв", - акцэнтаваў увагу Аляксандр Вальфовіч.
Ён нагадаў ісціну аб тым, што войны выйграюць не арміі, а народы. "Народ да абароны сваёй краіны павінен быць заўсёды гатовы. Таму ва Узброеных Сілах, іншых структурах сілавога блока праводзяцца такія мабілізацыйныя праверачныя зборы, на якія на 25-30 сутак заклікаюць ваеннаабавязаных запасу розных катэгорый. Яны аднаўляюць свае навыкі. Гэта цалкам нармальная практыка падрыхтоўкі", - адзначыў дзяржсакратар Савета бяспекі.-0-
