12 лютага, Мінск /Кар. БЕЛТА/. Прэзідэнт Беларусі Аляксандр Лукашэнка даручыў на працягу першага паўгоддзя правесці перарэгістрацыю партый. Аб гэтым кіраўнік дзяржавы заявіў сёння, падводзячы вынікі VI Усебеларускага народнага сходу, перадае карэспандэнт БЕЛТА.
Адпаведная задача была пастаўлена Міністэрству юстыцыі. А сама ініцыятыва аб перарэгістрацыі партый прагучала ў час форуму. "Гэта правільна. Трэба дапрацаваць той закон, які ёсць, разумеючы, што ён нам будзе патрэбны, і пасля Канстытуцыі мы будзем многія законы дапрацоўваць. Давайце цяпер гэта зробім і правядзём перарэгістрацыю партый, - сказаў Аляксандр Лукашэнка. - А людзей папярэдзьце, каб яны думалі, перш чым уступаць у нейкую палітычную арганізацыю".
У той жа час на Усебеларускім народным сходзе гучалі думкі, што партыям пакуль рана прадастаўляць магчымасць выбірацца ў парламент па партыйных спісах, паколькі большасць палітычных арганізацый у краіне існуюць фактычна толькі на паперы. А значыць, да фарміравання партый трэба падыходзіць больш сур'ёзна.
"Трэба проста заняцца партыйным будаваннем, і калі мы ўбачым, што ў выніку гэтага працэсу (ён можа быць хуткім, можа быць вельмі доўгім), калі людзі зразумеюць, што партыя Алега Гайдукевіча (дэпутат, лідар Ліберальна-дэмакратычнай партыі Беларусі. - Заўвага БЕЛТА) адрозніваецца ад партыі Аляксея Камая (старшыня савета Камуністычнай партыі Беларусі. - Заўвага БЕЛТА), тады можна людзям прапаноўваць галасаванне па партыйных спісах", - сказаў Прэзідэнт.
Акрамя таго, звярнуў увагу кіраўнік дзяржавы, само грамадства павінна быць гатова для ўвядзення гэтых навацый. Важна не раздзяліць грамадзян правядзеннем падобных рэформ, падкрэсліў Аляксандр Лукашэнка. "Таму трэба ісці асцярожна, як па тонкім лёдзе. Інакш правалімся і не выкарабкаемся. Сёння не час для сумніўных эксперыментаў", - адзначыў ён.-0-
