29 лютага, Мінск /Кар. БЕЛТА/. Прэзідэнт Беларусі Аляксандр Лукашэнка даручыў на працягу паўгода навесці парадак у сістэме падрыхтоўкі футбалістаў. Аб гэтым журналістам расказаў старшыня Асацыяцыі "Беларуская федэрацыя футбола" (АБФФ) Мікалай Шарснёў па выніках даклада кіраўніку дзяржавы аб развіцці беларускага футбола, перадае карэспандэнт БЕЛТА.
Мікалай Шарснёў падкрэсліў, што важна тэхналогія выхавання футбаліста і давядзення яго да спартыўнай дасканаласці. "Калі гэта тэхналогія працуе, заўсёды на выхадзе будзе выдатны спартсмен", - сказаў ён.
Таму, прадоўжыў кіраўнік АБФФ, з яго прыходам на гэту пасаду стаяла задача разабрацца з тым, што ёсць у сістэме падрыхтоўкі футбаліста і супаставіць з той элітнай сістэмай, якая была ў ранейшыя гады, у тым ліку ў час Савецкага Саюза. У выніку ўбачылі шэраг агрэхаў. Так, раней дакладна працавала сістэма падрыхтоўкі дзіцяча-юнацкага футбола, якая складалася з шэрага ступеней, пачынаючы ад рэгіянальных дзіцяча-юнацкіх спартыўных школ: "Была выбудавана дакладная піраміда падрыхтоўкі юнага футбаліста і забяспечаны пераход у дубліруючыя склады, маладзёжны склад і, адпаведна, прафесійны футбол".
Цяпер жа неабходна ў сучасных умовах адрадзіць тыя лепшыя практыкі і навесці парадак у сістэме падрыхтоўкі футбалістаў. "Пастаўлена задача на працягу паўгода навесці парадак. Гэта значыць, выбудаваць сістэму падрыхтоўкі футбалістаў, забяспечыць плаўны пераход у маладзёжны футбол і ў дарослы футбол. Усё, што на сённяшні дзень разбалансавана ў нарматыўнай базе, прывесці ў парадак. Наперадзе паўгода плённай працы, і тое, што страчана па розных прычынах за многія гады, аднавіць і зрабіць футбол тым відам спорту, які любяць і цэняць", - заявіў Мікалай Шарснёў.
Ён падкрэсліў, што трэба ўдасканальваць падыходы і ісці ў нагу з часам: "Мы бачым, куды рухаецца сёння свет, куды рухаюцца ў напрамку развіцця футбола ў Еўропе. Трэба ў адпаведнасці з гэтым усё рабіць, каб не адставаць. Сістэма, якую мы створым, будзе асноватворнай на доўгія гады".
За мінулы год прыняты ўжо шэраг рашэнняў, накіраваных на ўдасканаленне падрыхтоўкі футбалістаў. "Мы бачым, што нам неабходна. Па-першае, на больш раннім узроўні сабраць ігракоў і даць ім умовы для работы ў зборнай. Патрабаванні ФІФА апускаюцца па ўзростах ніжэй і ніжэй. У нас гэта тэма застопарылася. Мы прынялі рашэнне пры Федэрацыі практычна апусціцца ў наборы лепшых ігракоў з ДЮСШ з рэгіёнаў, з футбольных акадэмій да 12 гадоў. Тым самым мы дадзім гэтым хлопцам магчымасць ужо разам працаваць да выхаду з акадэміі", - расказаў Мікалай Шарснёў.
Старшыня АБФФ адзначыў, што раней з футбольнай акадэміі выпускаліся ў 17 гадоў пасля заканчэння сярэдняй школы, цяпер жа выпрацавалі іншы падыход.
"Прынята рашэнне іх захаваць. Гэту каманду зрабіць асноватворнай для будучага развіцця футбола, г.зн. 17-гадовыя хлопцы застаюцца ў акадэміі футбола. У 18, 19 гадоў яны працуюць у акадэміі. Акадэмія ім дае фізічную нагрузку, больш аб'ёмны трэніровачны працэс. Усё гэта пад кантролем. Плюс міжнародныя таварыскія матчы, розныя турніры, каб была найграна міжнародная спаборніцкая практыка", - растлумачыў ён.
Прынята рашэнне, што гэта каманда 17-гадовых футбалістаў ужо ў бягучым годзе будзе гуляць у складзе Першай лігі нараўне з прафесіяналамі. "Сезон, вядома, дасць вельмі шмат вопыту хлопцам. І практычнага, і тэарэтычнага, - падкрэсліў Мікалай Шарснёў. - У любым выпадку, праз год-два мы ўбачым ужо вынік гэтай каманды, зусім адрозны ад таго, што мы маем сёння".
Дарэчы, гэта каманда ўжо атрымлівае сур'ёзныя перамогі. Напрыклад, была здабыта перамога на Кубку развіцця - у вырашальным паядынку 17-гадовыя футбалісты перайгралі расійскіх аднагодак з лікам 2:1. Са станоўчым вынікам для юнацкай беларускай каманды скончыўся і нядаўні матч з камандай з Саудаўскай Аравіі.
Для развіцця духу саперніцтва, паляпшэння якасці падрыхтоўкі і адбору ігракоў і ў цэлым павышэння цікавасці ў людзей да айчыннага футбола прынята рашэнне ўжо з гэтага сезона ўвесці пастаянны чэмпіянат па ўзростах 12,13 і 14 гадоў.
"Гэта дае тое, што дзіцяча-юнацкія спартыўныя школы абавязаны будуць сфарміраваць узроставыя каманды. Тое, чаго няма сёння. Няма чэмпіянатаў пастаянных - адпаведна, навошта тады ў ДЮСШ мець футбольную каманду? Адпаведна, калі няма футбольнай каманды, то навошта тады трэнеру напружвацца наконт нейкіх спартыўных параметраў?- абазначыў слушныя пытанні кіраўнік АБФФ.- Гэта тое, пра што я сказаў у пачатку - сістэма разбалансавана. Яна як бы ёсць, але разбалансавана. І калі мы яе роўна збяром у адзінае цэлае, махавік закруціцца, і не трэба будзе кіраваць. Трэба будзе падпраўляць і дапамагаць. Але махавік будзе сам працаваць".
У гэтых спаборніцтвах змогуць удзельнічаць каманды з розных школ. "Хто жадае - заяўляйцеся камандай і ўдзельнічайце. Мы не дзелім. Аб'ядноўвае спорт. Гэта ўжо літаральна на працягу сезона памяняе стаўленне да спорту. Гэтыя дзеткі будуць на вачах ва ўсіх трэнераў, стане больш плённай селекцыя ігракоў, вядома ж, з'явіцца цікавасць і бацькоў, і аднакласнікаў. Пачнуць запаўняцца і стадыёны. Вось гэты махавік пачне працаваць. З'явіцца зусім іншае стаўленне да футбола", - упэўнены Мікалай Шарснёў.-0-
