2 ліпеня, Мінск /Кар. БЕЛТА/. Беларусь сутыкнулася з феноменам адкладзенага дзеяння калабарацыянізму ў рэаліях сённяшняга часу. Аб гэтым Прэзідэнт Беларусі Аляксандр Лукашэнка заявіў сёння на ўрачыстым сходзе ў гонар Дня Незалежнасці, перадае карэспандэнт БЕЛТА.
"Мы ведаем, што многія з выклікаў нашай дзяржаўнасці і суверэнітэту, з якімі мы сутыкаемся сёння, ідуць сваімі каранямі ў гады Вялікай Айчыннай вайны. Скажу больш, мы сутыкнуліся з феноменам адкладзенага дзеяння калабарацыянізму ў рэаліях нашага часу", - заявіў Аляксандр Лукашэнка.
Прэзідэнт заўважыў, што не ўпершыню ў гісторыі Беларусі з'яўляюцца "змагары", якія страчваюць сувязь з роднай зямлёй і ўдзельнічаюць у злачынствах супраць уласнага народа. Так, паводле яго слоў, было ў перыяд Айчыннай вайны 1812 года, калі частка мясцовай эліты стала пад сцягі напалеонаўскай арміі. Так было ў Першую і Другую сусветныя войны, калі здраднікі прысягнулі кайзераўскай і гітлераўскай Германіі. "Так, на жаль, часткова здарылася і ў нашы дні", - канстатаваў кіраўнік дзяржавы.
"На авансцэну выйшлі сучасныя калабаранты - ідэйныя паслядоўнікі, сярод якіх ёсць і патомныя наследнікі нацыстаў, - сказаў Аляксандр Лукашэнка. - Яны хочуць павярнуць гісторыю назад, рэабілітаваць сваіх дзядоў і прадзедаў і завяршыць пачатую імі справу. Таму выйшлі знішчаць суверэнную дзяржаву. Гэта неймаверна: да сакральных месцаў нашай дзяржаўнасці яны рушылі пад сцягамі фашысцкіх наймітаў - паліцаяў. Мы павінны былі абараніць свой суверэнітэт і краіну. І час паказаў, што мы зрабілі правільна. Ужо, напэўна, няма аблудных, падманутых у краіне, якія не пераканаліся б, што адбывалася ў рэчаіснасці ўчора і адбываецца сёння. Засталіся толькі ворагі, якія кажуць: не, гэта не так, гэта іншае. І вы павінны гэта разумець".-0-
