29 лістапада, Мінск /Уладзімір Мацвееў - БЕЛТА/. Прэзідэнт Беларусі Аляксандр Лукашэнка сёння на сустрэчы з паслом Узбекістана Насірджанам Юсупавым пацвердзіў прыхільнасць краіны да поўнай рэалізацыі дарожнай карты двухбаковага супрацоўніцтва, перадае карэспандэнт БЕЛТА.
"Мы зацвердзілі нядаўна дарожную карту - план нашай дзейнасці на перспектыву. Прэм'ер-міністры падпісалі гэты план. Перадайце Шаўкату Мірамонавічу (Прэзідэнт Узбекістана Шаўкат Мірзіёеў. - Заўвага БЕЛТА), што я строга буду кантраляваць выкананне гэтага плана, мы прыхільныя да поўнай яго рэалізацыі", - падкрэсліў беларускі лідар.
Аляксандр Лукашэнка адзначыў, што супрацоўніцтва Беларусі з дружалюбным Узбекістанам развіваецца вельмі добра і інтэнсіўна. "Самы галоўны вынік усяго гэтага, што мы навярсталі тое адставанне ў нашым супрацоўніцтве, якое накапілася за папярэднія гады. Я ўжо гаварыў пра вашага Прэзідэнта, што гэта ў асноўным яго заслуга", - сказаў кіраўнік дзяржавы.
Гаворачы пра лідара Узбекістана, Прэзідэнт Беларусі адзначыў, што яшчэ на пасадзе прэм'ер-міністра Шаўкат Мірзіёеў займаўся стратэгіяй развіцця краіны. "Гэта чалавек, які ведае і любіць Узбекістан, які зрабіў шмат добрага для Узбекістана ўласнымі рукамі. Ён бачыў усе праблемы. Таму калі стаў Прэзідэнтам, яму не трэба было ўваходзіць у курс спраў, глядзець на кадры. Ён усё бачыў знутры. Ён вельмі хутка разгарнуўся, і па ўсіх напрамках у яго поспех", - канстатаваў кіраўнік дзяржавы.
"Я многіх бачыў прэзідэнтаў - ніхто з нас так актыўна, так хутка не вырашаў тыя праблемы, якія наспелі. Ён проста малайчына. Я гэта гавару шчыра", - падкрэсліў беларускі лідар, маючы на ўвазе заслугі Шаўката Мірзіёева на прэзідэнцкай пасадзе.
Ён таксама адзначыў, што краінам у гэты перыяд удалося ліквідаваць запазычанасць у развіцці супрацоўніцтва, якая склалася за папярэднія паўтара-два дзясяткі гадоў.
Аляксандр Лукашэнка заявіў, што Прэзідэнта Узбекістана чакаюць з візітам у Беларусі ў любы зручны для яго час. "Вам акажам усялякую падтрымку тут, каб арганізаваць візіт. Мы яго будзем сустракаць як нашага не проста сябра - гэта наш брат, чалавек, які вельмі любіць Беларусь. Гэта мяне заўсёды падкупляе. І ён сапраўды шчыра ставіцца да Беларусі, таму што добра ведае нашу краіну. Мы для вас заўсёды будзем надзейным партнёрам, закрытых тэм для супрацоўніцтва няма. Многае пачалі ўжо рабіць і многае яшчэ зробім", - рэзюмаваў кіраўнік беларускай дзяржавы.
Супрацоўніцтва паміж Беларуссю і Узбекістанам мае канструктыўны характар. У верасні бягучага года адбыўся афіцыйны візіт Прэзідэнта Беларусі ва Узбекістан, па выніках якога дасягнуты шэраг канкрэтных дамоўленасцей па пашырэнні ўзаемадзеяння ў гандлёва-эканамічнай, адукацыйнай, культурнай і іншых сферах, падпісана 17 двухбаковых пагадненняў. Зацверджаны план мерапрыемстваў (дарожная карта) па развіцці супрацоўніцтва паміж краінамі. У цэлым дагаворна-прававая база двухбаковых адносін уключае больш за 60 пагадненняў.
У 2017 годзе тавараабарот склаў $130,9 млн (205,4 працэнта да ўзроўню 2016 года), экспарт - $96,1 млн (рост у 2,7 раза), імпарт - $34,8 млн (124,7 працэнта). Сальда склалася дадатнае ў памеры $61,3 млн.
Тэндэнцыя росту гандлёвага супрацоўніцтва паміж Беларуссю і Узбекістанам прадаўжаецца і ў 2018 годзе. Так, у студзені-верасні аб'ём двухбаковага тавараабароту склаў $121 млн (павялічыўся на 47,2 працэнта да адпаведнага перыяду 2017 года), у тым ліку экспарт тавараў - $91,5 млн (вырас на 56,3 працэнта), імпарт - $29,5 млн (павялічыўся на 24,7 працэнта). Сальда знешняга гандлю таварамі дадатнае - $62 млн.
Ва Узбекістане зарэгістраваны 24 арганізацыі, заснавальнікамі якіх з'яўляюцца юрыдычныя і фізічныя асобы Беларусі, у тым ліку два суб'екты тавараправоднай сеткі са стапрацэнтным капіталам беларускіх холдынгаў: ЗП ТАА "AMKODOR-TASHKENT", ЗП ТАА "MAZ-TASHKENT". У 2017 годзе на тэрыторыі Узбекістана створаны дзве зборачныя вытворчасці беларускай тэхнікі з удзелам беларускага капіталу (сузаснавальнікі - ААТ "Амкадор", ААТ "Бабруйскаграмаш"). У Беларусі створана 47 арганізацый, заснавальнікамі якіх з'яўляюцца ўзбекскія юрыдычныя і фізічныя асобы.-0-
