22 красавіка, Мінск /Кар. БЕЛТА/. Беларусь настроена рашуча нарошчваць тавараабарот з Архангельскай вобласцю. Аб гэтым Прэзідэнт Беларусі Аляксандр Лукашэнка заявіў на сустрэчы з губернатарам Архангельскай вобласці Расіі Аляксандрам Цыбульскім, перадае карэспандэнт БЕЛТА.
Цікава, што першы рабочы візіт Аляксандра Цыбульскага ў якасці кіраўніка Архангельскай вобласці ў Беларусь быў зроблены першым прамым авіярэйсам. Кіраўнік дзяржавы адзначыў важнасць гэтай падзеі.
"Добры пачатак. І для бізнесменаў, і для людзей асабліва з аддаленых куткоў Расіі. Прыехаць у Беларусь і не толькі пазнаёміцца з Беларуссю, але і атрымаць адпаведныя санаторна-курортныя працэдуры. У нас расіян вельмі шмат бывае, і мы змагаемся за першае-другое месца сярод расійскіх грамадзян па наведвальнасці замежных краін. Нам ёсць што прапанаваць адзін аднаму і ў сферы турызму", - сказаў Прэзідэнт.
Архангельская вобласць - даўні і надзейны партнёр Беларусі. Аднак бакі, як адзначыў кіраўнік дзяржавы, пакуль не дасягалі завоблачных лічбаў у тавараабароце. "Але, я мяркую, у нас усё наперадзе. З 2020 года ідзе планамернае павелічэнне аб'ёмаў узаемнага гандлю", - перакананы Аляксандр Лукашэнка.
Пяць гадоў таму бакі гаварылі аб дасягненні максімальнага на той момант абмену таварамі ў памеры $46 млн ($45,7 млн па выніках 2019 года). Але ўжо ў 2023 годзе быў устаноўлены новы рэкордны вынік - амаль $85 млн.
У пачатку бягучага года дадатная дынаміка захоўваецца. Тавараабарот павялічыўся ў 2,7 раза - да $27,5 млн. Пры гэтым апераджальнымі тэмпамі вырас імпарт з Архангельскай вобласці - у 4,6 раза, практычна да $22 млн. Беларускі экспарт расце больш сціплымі тэмпамі - усяго на 7,7 працэнта. "Але мы, вядома, настроены рашуча і, думаю, што падцягнемся ў бліжэйшы час", - заявіў кіраўнік дзяржавы.-0-
