13 сакавіка, Тэгеран /Кар. БЕЛТА/. Беларусь і Іран прыхільныя да ідэі пабудовы справядлівага шматпалярнага свету. Аб гэтым Прэзідэнт Беларусі Аляксандр Лукашэнка заявіў па выніках перагавораў з Прэзідэнтам Ірана Эбрахімам Раісі, перадае карэспандэнт БЕЛТА.
"Прыемна, што ў нас падобныя пазіцыі і падыходы да многіх пытанняў міжнароднага парадку дня. Галоўнае, што Беларусь і Іран прыхільныя да ідэі пабудовы справядлівага шматпалярнага свету", - сказаў кіраўнік дзяржавы.
Аляксандр Лукашэнка адзначыў, што мінулы раз наведваў Іран 17 гадоў таму. "Павінен канстатаваць, што ніякія санкцыі, ніякі націск не змаглі спыніць рух іранскага народа да сваёй незалежнасці і забеспячэння сваёй бяспекі", - падкрэсліў ён.
"Мы адзіныя ў меркаванні з Прэзідэнтам Ірана, што санкцыі - гэта час магчымасцей. Для нас вельмі важна не страціць гэты час", - дадаў кіраўнік дзяржавы.-Э-
