23 жніўня, Мінск /Кар. БЕЛТА/. Прэзідэнт Беларусі Аляксандр Лукашэнка бачыць неабходнасць далейшага ўмацавання таджыкска-афганскай граніцы. Аб гэтым ён заявіў сёння ў ходзе пазачарговай сесіі Савета калектыўнай бяспекі АДКБ, якая прысвечана сітуацыі ў Афганістане, перадае карэспандэнт БЕЛТА.
"З тэрарызмам звязаны непасрэдна рызыкі трансгранічнай злачыннасці, незаконнага абароту наркотыкаў і зброі, якія, відаць, будуць узрастаць, аб чым гаварыў Прэзідэнт Таджыкістана, - звярнуў увагу кіраўнік дзяржавы. - Улічваючы пэўную празрыстасць граніц паміж нашымі краінамі, гэта пытанне нас таксама сур'ёзна непакоіць. У гэтым кантэксце неабходна ўдзяліць увагу практычным мерам па далейшым умацаванні таджыкска-афганскай граніцы. Гэта тое, што нам трэба зрабіць у першачарговым парадку і абавязкова".
Аляксандр Лукашэнка лічыць мэтазгодным разгледзець пытанне аб правядзенні ў рамках АДКБ пазачарговых міждзяржаўных аперацый "Канал" (барацьба з наркатрафікам) і "Нелегал" (процідзеянне нелегальнай міграцыі). "Мы гэта рабілі раней і вельмі эфектыўна, практыка напрацавана", - сказаў кіраўнік дзяржавы.
А ў ходзе маючых адбыцца 18-23 кастрычніка бягучага года ў Таджыкістане вучэнняў АДКБ "Узаемадзеянне-2021", "Пошук-2021", "Эшалон-2021" неабходна адпрацаваць пытанні процідзеяння актуальным пагрозам з афганскага напрамку. "Пры гэтым мы не збіраемся шантажыраваць Афганістан, цяперашнія ўлады, талібаў. Не, мы проста выбудоўваем абарону нашых рубяжоў АДКБ на выпадак, калі...", - адзначыў Прэзідэнт.-0-