5 мая, Мінск /Кар. БЕЛТА/. Прэзідэнт Беларусі Аляксандр Лукашэнка азнаёміцца з айчыннымі распрацоўкамі ў сферы электратранспарту. Кіраўнік дзяржавы наведае сёння рэспубліканскі палігон для выпрабаванняў мабільных машын Аб'яднанага інстытута машынабудавання Нацыянальнай акадэміі навук, перадае карэспандэнт БЕЛТА.
Плануецца, што Прэзідэнту даложаць аб выкананні даручэнняў па стварэнні айчыннага электратранспарту, дзейнасці палігона. Аляксандр Лукашэнка азнаёміцца з выпрабавальнай тэхнікай і абсталяваннем для выпрабаванняў, распрацоўкамі ў галіне электратранспарту.
У Беларусі створана рабочая група па распрацоўцы праекта дзяржаўнай праграмы "Развіццё электратранспарту" на 2021-2025 гады. Ужо распрацавана канцэпцыя развіцця электратранспарту на абазначаны перыяд, а таксама да 2030 года. Зацверджаны комплекс мер па стварэнні доследных узораў электратранспарту, арганізуецца інфраструктура для даследаванняў і выпрабаванняў кампанентаў сілавога электрапрывода транспартных машын.
Работы па развіцці электратранспарту вядуцца па самых розных напрамках. Гэта не толькі легкавыя аўтамабілі, але і грузапасажырскія, мінівэны. Створаны ўзор лёдазалівачнага камбайна з электрапрыводам. Таксама выраблены доследныя ўзоры электравеласіпедаў, электраскутараў, электрасамакатаў. Арганізаваны эксперыментальны ўчастак па зборцы літыйіонных акумулятарных батарэй для персанальных электрычных транспартных сродкаў. Паралельна ствараецца інфраструктура для выкарыстання электратранспарту, уключаючы вытворчасць і ўстаноўку зарадных станцый. Электратэхналогіі прымяняюцца і пры стварэнні беспілотных лятальных апаратаў.-0-
