5 жніўня, Паставы /Кар. БЕЛТА/. Стварэнне аграпрамысловых аб'яднанняў у Віцебскай вобласці - правільная стратэгія, але іх работа павінна даваць вынік. Аб гэтым Прэзідэнт Беларусі Аляксандр Лукашэнка заявіў у Паставах на нарадзе аб рабоце аграпрамысловых аб'яднанняў Віцебскай вобласці, перадае карэспандэнт БЕЛТА.
"Трэба прадаўжаць узбуйненне гаспадарак. Але не павінна быць штучнага аб'яднання", - падкрэсліў Аляксандр Лукашэнка.
Пры гэтым Прэзідэнт заўважыў, што неабходна ў якасці стымулу дапамагаць тым прадпрыемствам, да якіх далучаюць адстаючыя гаспадаркі. "Аб'яднанне павінна быць усвядомленым. Вы павінны бачыць перспектыву", - сказаў кіраўнік дзяржавы.
"Тое, што робім мы ў Віцебскай вобласці, стратэгія правільная. І мы толькі, прыняўшы рашэнне, да паловы дайшлі. У якім плане: мы вызначылі сыравінныя зоны для перапрацоўчых прадпрыемстваў. Але потым яшчэ больш важна, каб уласны фірменны гандаль быў. Ён павінен быць пашыраны, - лічыць Аляксандр Лукашэнка. - І пашыраць не толькі ў Беларусі. Трэба ісці ў Расію".
"Таму інтэграцыйным структурам у Віцебскай вобласці быць. І няма чаго тут сёння гаварыць аб тым, што гэта няправільна, што не гэтым шляхам трэба было ісці. А якім? Які яшчэ ёсць шлях для канцэнтрацыі прыбытку?" - спытаў Прэзідэнт.
У той жа час ён адзначыў, што, калі прадпрыемствы могуць працаваць самастойна і дасягаць пастаўленых мэт, то няхай і працуюць самі. Гэта нават будзе садзейнічаць здаровай канкурэнцыі. "Мы ні на каго не націскаем, штучна не ўпіхваем у інтэграцыйныя структуры", - звярнуў увагу кіраўнік дзяржавы.
Але работай створаных у галіне інтэграцыйных структур Прэзідэнт не задаволены. "З якога боку ні паглядзі, гэта рашэнне правільнае. Паўстае пытанне: а вынік?" - сказаў Аляксандр Лукашэнка.
Апошні раз на ўзроўні кіраўніка дзяржавы гэта пытанне абмяркоўвалася некалькі месяцаў таму - у час яго сакавіцкай паездкі ў Глыбокае. "І "тузаць" Віцебшчыну па пытанні выніку ад інтэграцыйных аб'яднанняў мы будзем вельмі часта", - папярэдзіў ён.
У пачатку года па аграпрамысловых аб'яднаннях была атрымана страта ад рэалізацыі прадукцыі. Палова аб'яднанняў мела адмоўную рэнтабельнасць, раслі пратэрмінаваныя даўгавыя абавязацельствы.
"Але вы мне тады абяцалі ўсім калектывам, што палепшыце дынаміку фінансавых паказчыкаў гэтых структур, укамплектуеце пагалоўем жывёлы існуючыя фермы і комплексы, нарыхтуеце якасныя кармы, палепшыце выканальніцкую дысцыпліну і адказнасць кадраў на месцах", - нагадаў Прэзідэнт.
У цэлым па аграпрамысловых аб'яднаннях за першае паўгоддзе вытворчасць скарацілася больш як на 8 працэнтаў да ўзроўню мінулага года. Нягледзячы на некаторую дадатную дынаміку асобных фінансавых паказчыкаў, два буйнейшыя аграпрамысловыя аб'яднанні - Віцебскі і Аршанскі мясакамбінаты - працуюць са стратамі.
"Але што мяне больш за ўсё абурае. Было адпаведнае запатрабаванне аб своечасовых разліках за закупляемыя ў насельніцтва малако і мяса. Няўжо гэта такія вялікія грошы?" - выказаў здзіўленне Аляксандр Лукашэнка.
За паўгоддзе ў цэлым па аграпрамысловых аб'яднаннях вытворчасць жывёлы і птушкі ў жывой вазе зменшылася больш як на 12 працэнтаў, вытворчасць малака - на 6,5 працэнта. Скараціліся малочны статак і сярэднія ўдоі.
"З-за недахопу сыравіны застаюцца незагружанымі магутнасці перапрацоўчых прадпрыемстваў. Два - Пастаўскі малочны завод і Верхнядзвінскі масласырзавод - былі загружаны на 100 працэнтаў. Праблемы нарастаюць як снежны ком. Некаторыя кіраўнікі закрэдытаваных прадпрыемстваў прадаўжаюць спадзявацца, што ім спішуць даўгі, дапамогуць і гэтак далей. Будзем дапамагаць усім, хто ўпіраецца і дае вынік, - заявіў Прэзідэнт. - Не трэба мне гаварыць пра нейкія аб'ектыўныя акалічнасці. Умовы надвор'я нармальныя, я сказаў бы, ідэальныя".
На нарадзе сваім меркаваннем аб практычных выніках работы аграпрамысловага аб'яднання падзяліўся старшыня Пастаўскага райвыканкама Сяргей Чэпік. "Гэты напрамак адзіны правільны. За ім будучыня. Рух наперад ёсць. Мы дакладна разумеем, куды мы будзем рухацца, выбудавана дакладная стратэгія работ", - сказаў ён.
Аб'яднанне і прыняцце мер у рамках адпаведнага прэзідэнцкага ўказа дало магчымасць умацавацца тэхнічна і кадрава, выбудаваць больш аптымальную схему работ па развіцці сыравіннай базы для галаўнога прадпрыемства - Пастаўскага малочнага завода. "Самае галоўнае, мы сюды набралі нармальныя кадры - спецыялісты, прафесіяналы. Далі добрую зарплату. Стварылі ім умовы", - адзначыў кіраўнік раёна.
З ім згодны і дырэктар завода Канстанцін Гайлеўскі. Паводле яго слоў, першачарговай праблемай у нарошчванні вытворчасці сельскагаспадарчых прадпрыемстваў аб'яднання была адсутнасць належнай дысцыпліны - як тэхналагічнай, так і працоўнай. На жаль, канстатаваў ён, гэта праблема да канца не выкаранена, але над гэтым актыўна працуюць. Паказчыкі па бізнес-плане развіцця аб'яднання практычна ўсё выконваюцца, у тым ліку па выручцы і прыбытку.
Аляксандр Лукашэнка звярнуў асаблівую ўвагу на пытанне забеспячэння захаванасці тэхнікі: "Шмат тэхнікі энерганасычанай, яна дарагая. І калі яе нармальна не захоўваць - труба. Гэта датычыцца ўсіх. Захаванасць тэхнікі, асабліва энерганасычаныя трактары, - гэта пытанне нумар адзін".
Ён нагадаў, што ў Мядзельскім раёне нядаўна наведваў узорны машынны двор у новай гаспадарцы. "Мы паказалі ў Мядзельскім раёне. Машынны двор зрабілі ўзорным на месцы старога. Да гэтага павінны імкнуцца. Нядорага ён абышоўся. Трэба машынны двор, зернесушылка і малочнатаварныя комплексы. Для Віцебскай вобласці менавіта МТК. Комплексы свінагадоўчыя і птушкагадоўчыя, напэўна, мы дадаткова у Віцебскай вобласці будаваць ужо не будзем. Давайце будзем займацца малаком і БРЖ. Гэта ж вялікі шлейф", - сказаў Прэзідэнт.
"Гэта наш шлях. Так, адразу не схопім. Але калі зубы сціснем, за пяцігодку вырвемся", - падкрэсліў беларускі лідар.
Дысцыпліна, парадак, кадры, забеспячэнне захаванасці ўраджаю і тэхнікі - на гэтых пытаннях асабліва засяродзіў увагу Прэзідэнт, папярэдзіўшы ўсіх аб персанальнай адказнасці. "Вы павінны быць гаспадарамі тут. Ніхто не будзе прымаць скаргі на жорсткасць запатрабаванняў. Патрэбны вынік! Зямля ёсць, тэхніка ёсць добрая", - сказаў ён.
Што датычыцца дадатковай фінансавай падтрымкі, то толькі пад перспектыўныя праекты і вынік, папярэдзіў Прэзідэнт. Стратэгія развіцця вобласці складваецца менавіта на месцах.
За развіццё інтэграцыйных структур у вобласці непасрэдна адказвае намеснік старшыні аблвыканкама Анжаліка Нікіціна. Паводле яе слоў, на сённяшні дзень аб'яднанне ў Паставах найлепшае сярод усіх. На другім месцы структура на чале з Верхнядзвінскім масласырзаводам. Прадукцыя актыўна ідзе не толькі на ўнутраны рынак, але і на экспарт.
У цэлым пэўная дадатная дынаміка па аграпрамысловых аб'яднаннях ёсць, але пакуль гэтага недастаткова, каб сельгаспрадпрыемствы поўнасцю забяспечвалі сябе той выручкай, якая ім патрэбна для выканання даўгавых абавязацельстваў і развіцця, канстатавала Анжаліка Нікіціна ў гутарцы з журналістамі пасля нарады.
Аднак у рэгіёне глядзяць на сітуацыю з аптымізмам і ў бліжэйшай перспектыве разлічваюць на выпраўленне сітуацыі і замацаванне ўжо дасягнутых поспехаў.
"Перапрацоўка - маржынальны від дзейнасці. Мы той прыбытак, які мае перапрацоўшчык, размяркоўваем уніз, каб гэты прыбытак дайшоў да сельгасарганізацый. Нам трэба пераразмеркаваць прыбытак, укласці ў сельгасарганізацыі, атрымаць там прадукцыю, паставіць на перапрацоўку, прадаць праз гандлёвую сетку і на экспарт. І тады гэты механізм будзе абарачальным, і мы такім чынам палепшым эканоміку сельгасарганізацый. Мы падтрымліваем сыравінныя зоны, развіваем сельскія тэрыторыі", - сказала намеснік кіраўніка вобласці.-0-
