7 лютага, Мінск /Уладзімір Мацвееў - БЕЛТА/. Прэзідэнт Беларусі Аляксандр Лукашэнка адзначае спакой на фінансавым рынку краіны, у чым бачыць і немалую заслугу Нацыянальнага банка. Аб гэтым ён заявіў сёння на сустрэчы са старшынёй праўлення Нацыянальнага банка Паўлам Калаурам, перадае карэспандэнт БЕЛТА.
Гаворачы пра бягучую сітуацыю, кіраўнік дзяржавы канстатаваў спакой на фінансавым рынку і адсутнасць якіх-небудзь насцярожанасцей у сувязі з гэтым у грамадстве. "Як бы нас нехта там не крытыкаваў, тое, што было, і тое, што ёсць - гэта неба і зямля. Можа, некаму не падабаецца вельмі строгая фінансавая палітыка ў дзяржаве, але яна накіравана на захаванне стабільнасці. Таму я баюся гаварыць дзякуй, але тым не менш работнікі Нацыянальнага банка заслугоўваюць гэтай падзякі", - заявіў беларускі лідар.
Аляксандр Лукашэнка нагадаў, што кіраўнік Нацбанка нясе персанальную адказнасць за забеспячэнне фінансавай стабільнасці. "Кіраўнікі камерцыйных банкаў ведаюць гэтыя падыходы. Старайцеся знайсці з імі агульную мову і выбудаваць бяспечную работу ў сферы фінансаў. Апошнім часам мы менш гаворым пра грошы, фінансы. Кажуць, грошы любяць цішыню. Мы прытрымліваемся гэтых прынцыпаў", - адзначыў Прэзідэнт.-0-
