10 лютага, Мінск /Кар. БЕЛТА/. Прэзідэнт Беларусі Аляксандр Лукашэнка 10 лютага падпісаў указ нумар 32, які прадугледжвае ўнясенне змяненняў ва ўказ нумар 381 ад 5 кастрычніка 2021 года "Аб будаўніцтве размеркавальных электрычных сетак". Аб гэтым БЕЛТА паведамілі ў прэс-службе кіраўніка дзяржавы.
Дакумент накіраваны на забеспячэнне падключэння жылых дамоў, электразабеспячэнне якіх ажыццяўляецца арганізацыямі Беларускай чыгункі, да сетак энергазабеспячальных арганізацый Міністэрства энергетыкі.
У адпаведнасці з указам энергазабеспячальным арганізацыям прадастаўляецца права выступаць заказчыкамі па праектаванні, узвядзенні і рэканструкцыі размеркавальных электрычных сетак для жылых дамоў, падключаных да сетак арганізацый БЧ, а таксама магчымасць фінансавання гэтых работ за кошт сродкаў рэспубліканскага бюджэту, што выдзяляюцца на рэалізацыю дзяржаўных праграм, і іншых крыніц.-0-
