19 мая 2025, 11:35

Лукашэнка аб супрацоўніцтве з Краснаярскім краем Расіі: паказчыкі нядрэнныя, але патэнцыял значна большы

19 мая, Мінск /Кар. БЕЛТА/. Беларусь і Краснаярскі край Расіі нядрэнна супрацоўнічаюць, але існуючы патэнцыял дазваляе рабіць гэта яшчэ больш эфектыўна. Аб гэтым Прэзідэнт Беларусі Аляксандр Лукашэнка заявіў 19 мая на сустрэчы з губернатарам Краснаярскага края Расіі Міхаілам Кацюковым, перадае карэспандэнт БЕЛТА.

Кіраўнік дзяржавы ў першую чаргу звярнуў увагу на гандлёва-эканамічнае ўзаемадзеянне краіны з расійскім рэгіёнам. "Павінен заўважыць, што мы нядрэнна супрацоўнічаем. Аб гэтым сведчыць рост тавараабароту - у межах $200 млн мы заўсёды знаходзімся, недзе крыху менш, больш", - сказаў Прэзідэнт. - Але гэты паказчык мы можам значна павялічыць у сувязі з тым патэнцыялам, які маюць вобласць і наша рэспубліка".

Аляксандр Лукашэнка адзначыў, што напрамкі развіцця супрацоўніцтва добра вядомы. Да ключавых належаць, напрыклад, пастаўкі тэхнікі, абсталявання для гарнаруднай прамысловасці. "Такой тэхнікі, у тым ліку БЕЛАЗаў, у нас дастаткова, і з вамі, і з іншымі абласцямі Расійскай Федэрацыі, дзе гэта магчыма, мы гатовы і будзем супрацоўнічаць", - сказаў кіраўнік дзяржавы.

Прэзідэнт таксама абазначыў гатоўнасць Беларусі пастаўляць у Краснаярскі край іншую грузавую тэхніку, прадукцыю "АМКАДОРа" і МАЗа, якая ўжо добра зарэкамендавала сябе на расійскім рынку.

"Асобая тэма апошнім часам у Беларусі і ў Расіі - замена ліфтавага абсталявання. Тут нікуды не дзенешся. Тыя ліфты, якія мы некалі ўстанаўлівалі ў савецкі час, ужо свой тэрмін адслужылі, таму мы шмат пастаўляем ліфтаў па ўсім былым Савецкім Саюзе, і перш за ўсё ў Расійскую Федэрацыю. Ведаю, што патрэбнасць такая ёсць у вашай вобласці. Можаце на нас разлічваць", - запэўніў Аляксандр Лукашэнка.

Што датычыцца развіцця супрацоўніцтва ў сферы аўтатранспартных перавозак, Прэзідэнт адзначыў патэнцыял айчынных прадпрыемстваў па вытворчасці і пастаўцы на экспарт тэхнікі, у тым ліку і на газаматорным паліве. Размова ішла таксама пра гатоўнасць выпрацоўваць новыя формы ўзаемаразлікаў, у тым ліку пастаўкі па лізінгу.

"Супрацоўніцтва ў сферы аграпрамысловага комплексу і пастаўкі сельскагаспадарчай тэхнікі - вельмі перспектыўная, наша, беларуская тэма. Калі вам трэба будзе, мы заўсёды гатовы падставіць плячо вашай вобласці", - падкрэсліў кіраўнік дзяржавы. Прэзідэнт адзначыў і зацікаўленасць з боку Беларусі ў супрацоўніцтве ў галіне будаўніцтва: "Нашы магчымасці вы добра ведаеце. Таму можаце на нас разлічваць".

"Словам, вы і вашы калегі нядрэнна ведаеце магчымасці Беларусі. Калі мы можам недзе падставіць вам плячо або супрацоўнічаць разам на перспектыву, ведайце, што мы да гэтага гатовы", - падагульніў Аляксандр Лукашэнка.

За перыяд з 2020 года ўзаемны гандаль Беларусі і Краснаярскага края Расіі дасягнуў найбольшых значэнняў у 2022 годзе - амаль $234 млн. У наступным, 2023 годзе аб'ём двухбаковага тавараабароту крыху знізіўся, але ў 2024 годзе зноў вырас, перасягнуўшы $221 млн. Пры гэтым беларускі экспарт за абазначаны перыяд паступова ўзрастаў і па выніках мінулага года склаў $141,5 млн, што на 20 працэнтаў больш за паказчыкі 2023-га. У расійскі рэгіён пастаўляюцца ў асноўным спецыфічныя тавары, аўтамабілі спецыяльнага прызначэння, злучэнні, якія змяшчаюць функцыянальную нітрыльную групу, электрычныя трансфарматары, часткі і прылады для аўтамабіляў і трактароў, бытавыя і іншыя электранагравальныя прыборы, электрапліты.-0-

Падпісвайцеся на нас у