19 кастрычніка, Гродна /Аліна Грышкевіч - БЕЛТА/. Прэзідэнт Беларусі Аляксандр Лукашэнка лічыць важным для маладых людзей атрыманне вышэйшай адукацыі, пры гэтым адзначае высокую ролю прафесіяналізму. На гэта ён звярнуў увагу сёння ў час сустрэчы са студэнтамі гродзенскіх ВНУ, перадае карэспандэнт БЕЛТА.
Адзін са студэнтаў пацікавіўся меркаваннем кіраўніка дзяржавы, наколькі важным з'яўляецца ў жыцці наяўнасць вышэйшай адукацыі. Як падкрэсліў прэзідэнт, усё залежыць ад матывацыі: калі ты паставіў мэту стаць міністрам, то без вышэйшай адукацыі не абысціся.
Разам з тым Аляксандр Лукашэнка сказаў, што галоўным лічыць прафесіяналізм. Можна не мець вышэйшай адукацыі, але быць выдатным спецыялістам у сваёй справе, напрыклад зваршчыкам, муляром. Але нават у гэтых, здавалася б, простых прафесіях ёсць свая высокая планка, калі, напрыклад, размова ідзе аб плазменнай зварцы, стварэнні высокатэхналагічнага абсталявання.
"Вышэйшая адукацыя ў жыцці вельмі важна, але да таго ж трэба быць прафесіяналам, - адзначыў кіраўнік дзяржавы. - Без адукацыі многія рэчы проста немагчымы".-0-