11 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка патрабуе актыўней будаваць арэнднае жыллё для работнікаў сацыяльнай сферы. Аб гэтым кіраўнік дзяржавы заявіў сёння, заслухоўваючы даклад па праекце ўрадавай пастановы "Аб грамадзянах, маючых першачарговае права на прадастаўленне арэнднага жылля", перадае карэспандэнт БЕЛТА.
"Важнае пытанне, якое я хацеў бы абмеркаваць з вамі, датычыцца прадастаўлення арэнднага жылля для работнікаў сацыяльнай сферы. Адназначна, адна з ключавых задач, якая стаіць перад урадам на бліжэйшую пяцігодку, - развіццё рэгіёнаў. А развіццё рэгіёнаў без работнікаў сацыяльнай сферы немагчыма", - падкрэсліў Аляксандр Лукашэнка.
Ён дадаў, што размова ідзе аб падтрымцы розных катэгорый работнікаў сацсферы, у тым ліку ўрачоў і настаўнікаў. "Я не скрываю - гэта асноўныя нашы штыкі, на іх трымаецца не толькі прафесійная работа, але мы іх і часта прыцягваем да розных іншых дзяржаўных мерапрыемстваў", - сказаў Прэзідэнт. Ён адзначыў, што цяпер дзякуюць медыкам за работу ў няпростай эпідэміялагічнай сітуацыі, аднак жыллёвае пытанне для ўрача можа быць больш актуальным, чым словы ўдзячнасці.
"Мы неяк з вамі ўжо вызначаліся і маем узоры такіх дамоў: глядзелі іх у Бараўлянах, недарагія, вельмі зручныя. Такім чынам мы можам вырашыць кватэрныя пытанні для маладых урачоў і настаўнікаў. Гэта не проста інтэрнат (хаця так і называецца). Калі б мне ў маладосці такую кватэру, як у гэтым інтэрнаце... Інакш кажучы, недарагія, незатратныя праекты, якія мы можам рэалізаваць. Яны будуць неакупныя, але ўсё ж такі за арэнднае жыллё людзі плацяць нямала. Таму я не сказаў бы, што гэта такі ўжо страшна стратны праект. Трэба нам шырэй разгортваць будаўніцтва арэнднага жылля, і, пажадана, каб яно было ў прыярытэце, асабліва для ўрачоў, настаўнікаў, работнікаў сферы культуры і гэтак далей, - лічыць Аляксандр Лукашэнка. - Гэта, вядома, перш за ўсё датычыцца нашых рэгіёнаў, ды і ў Мінску ў нас нямала праблем па гэтых спецыялістах. Але вельмі важна, каб мы звярнулі ўвагу на рэгіёны. Тады і цякучасць кадраў зменшыцца, і людзі не будуць за мяжу ад'язджаць, каб зарабіць няшчасныя дзевяцьсот або тысячу еўра, а потым патраціць іх на звычайныя патрэбы. Інакш кажучы, гэтаму мы будзем удзяляць самую сур'ёзную ўвагу ў далейшым".
Гаворачы пра падрыхтаваны праект пастановы, Прэзідэнт пацікавіўся, ці ўсе пытанні ўлічаны ў дакуменце, ці ахоплены ўсе катэгорыі работнікаў сацыяльнай сферы. Таксама кіраўнік дзяржавы звярнуў увагу: трэба разумець, ці варта агульна прадастаўляць у якасці льготы паніжальны каэфіцыент пры арэндзе жылля. "Ёсць людзі, якія вельмі проста могуць аплаціць арэнднае жыллё, а ёсць людзі, якія маюць патрэбу ў падтрымцы. Таму на гэта пытанне трэба заўсёды звяртаць увагу, - растлумачыў ён. - І, самае галоўнае, які эфект мы атрымаем ад прыняцця такога рашэння. Эфект павінен быць адзін: людзі павінны замацоўвацца па месцы жыхарства, жыць і працаваць у сваёй краіне, і працаваць эфектыўна". Аляксандр Лукашэнка дадаў, што пытанне па арэндным жыллі прапрацоўвалася даўно, таму зацягваць з прыняццем рашэння не варта.
Як расказаў намеснік прэм'ер-міністра Ігар Петрышэнка, праект пастановы распрацоўваўся ўрадам сумесна з аблвыканкамамі. "На бягучы момант з агульнага арэнднага фонду - гэта 148 453 жылыя памяшканні - заселена больш за 92 працэнты. За апошнія два гады і першы квартал 2020-га маючым у гэтым патрэбу прадастаўлена каля 4,5 тыс. жылых памяшканняў арэнднага фонду", - удакладніў віцэ-прэм'ер.
Цяпер згодна з пастановай Саўміна ад 11 ліпеня 2016 года нумар 535 арэнднае жыллё ў першую чаргу прадастаўляецца трэнерам-выкладчыкам спецыялізаваных вучэбна-спартыўных устаноў, сярэдніх школ - вучылішчаў алімпійскага рэзерву і трэнерам нацыянальных каманд па відах спорту цэнтраў алімпійскай падрыхтоўкі. Новай пастановай прапануюць пашырыць пералік катэгорый работнікаў сацыяльнай сферы, якія маюць першачарговае права на атрыманне арэнднага жылля.
Як адзначылі ва ўрадзе, на сённяшні дзень з больш як 49 тыс. работнікаў сацыяльнай сферы, якія маюць патрэбу ў паляпшэнні жыллёвых умоў, жаданне атрымаць арэнднае жыллё выказалі каля 5 тыс. чалавек. Найбольш востра гэта пытанне стаіць у Мінскай і Гомельскай абласцях. Пры гэтым колькасць медыкаў, якія заключылі пяцігадовыя кантракты і маюць патрэбу ў арэндным жыллі, складае амаль 2,5 тыс. чалавек, педагогаў - 1,1 тыс., работнікаў культуры і творчых работнікаў - 631.
Пэўны станоўчы вопыт па забеспячэнні жыллём маладых спецыялістаў ёсць у сістэме аховы здароўя. За 2017-2019 гады жыллё атрымалі больш за 2,2 тыс. маладых урачоў: ім былі выдзелены 572 арэндныя кватэры, 534 асобныя пакоі ў інтэрнатах і каля 1,4 тыс. ложка-месцаў. Дзякуючы дзяржаўнай падтрымцы і дакладна выпрацаваным мерапрыемствам па забеспячэнні камфортным жыллём удалося дасягнуць высокага ўзроўню замацавання маладых спецыялістаў галіны на першым працоўным месцы пасля адпрацоўкі ўстаноўленага тэрміну. За апошнія пяць гадоў ён вырас з 69,5 працэнта да 83,5 працэнта. Вопыт Міністэрства аховы здароўя, лічаць ва ўрадзе, сведчыць аб неабходнасці заканадаўчага замацавання права работнікаў сацыяльнай сферы на першачарговае прадастаўленне арэнднага жылля.-0-
