29 мая, Мінск /Кар. БЕЛТА/. Прэзідэнт Беларусі Аляксандр Лукашэнка на нарадзе з кіраўніцтвам Савета Міністраў падкрэсліў неабходнасць выправіць сітуацыю з падзяжом жывёлы, перадае карэспандэнт БЕЛТА.
Кіраўнік дзяржавы звярнуў увагу, што падзеж жывёлы - пытанне, якое развальвае жывёлагадоўчую галіну. "Аб чым сведчыць статыстыка? Падзеж дасягнуў гістарычнага максімуму!" - абурыўся Прэзідэнт.
Дакладчыкамі аб мерах, што прымаюцца па выпраўленні сітуацыі, вызначаны віцэ-прэм'ер, які курыруе сферу АПК, і міністр сельскай гаспадаркі.
Аляксандр Лукашэнка, звяртаючыся да прэм'ер-міністра Аляксандра Турчына, які не так даўно працаваў на пасадзе старшыні Мінскага аблвыканкама, адзначыў, што ён павінен як ніхто іншы добра разумець сутнасць пытання і спосабы вырашэння. Да таго ж Прэзідэнт ужо абазначаў рэальны і просты шлях вырашэння праблемы з падзяжом жывёлы. У Беларусі ж ёсць шэраг гаспадарак, дзе падзеж знаходзіцца на вельмі нізкім узроўні, а тое і ўвогуле адсутнічае. І гэтыя гаспадаркі займаюцца як адкормам, так і ўзнаўленнем статка. Таму з тых гаспадарак Віцебскай, Магілёўскай або іншых абласцей, дзе ёсць падзеж, трэба забіраць цялят, заплаціўшы за іх адпаведны кошт, і пераводзіць у нармальныя гаспадаркі для таго, каб ажыццявіць дагадоўванне, адкорм. "Калі ты губіш маладняк, яго трэба проста забраць і перавесці туды, дзе з ім добра абыходзяцца, утрыманне добрае, ветурачы працуюць", - заўважыў кіраўнік дзяржавы.
"Я хачу, каб прысутныя тут, і прэм'ер-міністр, і міністр, асабліва віцэ-прэм'ер, якому дзесяць разоў пра гэта гаварылі, растлумачылі: ці так усюды, - сказаў Прэзідэнт. - А старшыня Камітэта дзяржкантролю і генеральны пракурор, які кантралюе гэтыя пытанні, даложаць, колькі пасадзілі за гэта. Яшчэ раз падкрэсліваю: я як чалавек вясковы, які працаваў у сельскай гаспадарцы, увогуле не разумею, як можна дапусціць гібель маленькіх гэтых дзетак - цялят. Як гэта можна?"
Асабліва абуральны той факт, што да ўтойвання падзяжу маюць дачыненне ветэрынарныя ўрачы. Гэта паказаў праведзены па краіне, і асабліва ў Віцебскай вобласці, аператыўны кантроль пры падрыхтоўцы да нарады. "Што мы заўважылі? Раённыя ветурачы, замест таго каб лячыць, прафілактаваць і іншае, абмяркоўваюць з урачамі ў гаспадарках, як утаіць гэты падзеж. Жах бярэ, - звярнуў увагу Аляксандр Лукашэнка. - Гэта кашмар. Гэта недапушчальна. За гэта трэба несці крымінальную адказнасць".
Аднак, паколькі тэма падзяжу жывёлы на гэтай нарадзе не з'яўляецца галоўнай, Прэзідэнт не стаў паглыбляцца ў пытанне, падкрэсліўшы, што наконт гэтага адбудзецца асобная прадметная размова. "Аб гэтым мы асобна пагаворым. Я не хачу, каб гэта важнейшае пытанне - сельскай гаспадаркі - было схавана за пералікам вось тых пытанняў, якія мной абазначаны (у якасці парадку дня нарады. - Заўвага БЕЛТА)", - сказаў кіраўнік дзяржавы.
Як паведамлялася, яшчэ напярэдадні, прымаючы з дакладам старшыню Брэсцкага аблвыканкама Пятра Пархомчыка, Прэзідэнт папярэджваў, што наконт падзяжу жывёлы ў гэтым годзе размова будзе вельмі жорсткая.
Кіраўнік дзяржавы ўпэўнены, што ўтаіць такія факты немагчыма, паколькі ў гэтым плане вельмі просты падлік. "Таму тут будзе размова вельмі сур'ёзная і прынцыповая. Таму што, захавай мы ўсё пагалоўе, мелі б і добры вынік", - сказаў ён.-0-
Падпісвайцеся на нас у
