21 ліпеня, Мінск /Кар. БЕЛТА/. Прэзідэнт Беларусі Аляксандр Лукашэнка ў інтэрв'ю інфармацыйнаму агенцтву Франс Прэс (AFP, Agence France-Presse) расказаў аб сваіх адносінах да Расіі і рэгулярных візітах на перагаворы з Прэзідэнтам гэтай краіны Уладзімірам Пуціным, перадае карэспандэнт БЕЛТА.
"Выязджаў, выязджаю і буду выязджаць. У бліжэйшы час. Вось заўтра мы з Уладзімірам Уладзіміравічам перагаворым. Ён папрасіў, каб заўтра мы па тэлефоне перагаварылі. Потым я паеду, буду сустракацца з ім. Столькі, колькі нам трэба. У нас такі ўзровень адносін, што ніякага дазволу для таго, каб мне ў Расію паехаць, не трэба", - заявіў кіраўнік дзяржавы.
Адказваючы на рэмарку аб тым, што Уладзімір Пуцін, у сваю чаргу, рэдка прыязджае ў Беларусь, Аляксандр Лукашэнка адзначыў: "Апошні раз я быў ініцыятарам таго, каб не ехаць у Гродна на Форум рэгіёнаў. Ён ужо сабраўся ехаць. Я абгрунтаваў сітуацыю і прывёў фактары пэўныя. Не таму, што мы там некага баімся. Не. Што мы ў Беларусі сустрэнемся ў іншы час".
Што датычыцца самой Расіі, Аляксандр Лукашэнка падкрэсліў, што гэта блізкая яму і родная краіна. "Родная. Я чалавек з таго свету. Я жыў у тым свеце, калі Масква была сталіцай маёй краіны. Таму я з задавальненнем туды прыязджаю. У Расіі столькі цікавага, такая прыгажосць, якую я не бачыў. Я хачу гэта паглядзець. Вось ён (Уладзімір Пуцін. - Заўвага БЕЛТА) мне прапануе: едзь на Алтай, едзь на Байкал, на Камчатку, пабудзь там, паглядзі, - расказаў Прэзідэнт. - Для мяне Расія адкрыта, мне гэта вельмі цікава".
Кіраўнік дзяржавы таксама адзначыў, што Уладзімір Пуцін, які нарадзіўся ў Санкт-Пецярбургу, вельмі добра ведае Беларусь, яе прыроду. "Ленінградская вобласць - гэта копія Беларусі. Ён ведае ў Беларусі ўсё. Таму тут няма чагосьці, што я туды прыязджаю, а ён сюды не едзе чамусьці", - растлумачыў Аляксандр Лукашэнка.
Ён дадаў, што апошнім часам пэўныя абмежаванні накладала і пандэмія, былі свае асаблівасці, што ўплывала на магчымасць арганізацыі паездак лідараў шэрага краін, у тым ліку і Расіі. "Два гады і да гэтага часу. Вы ведаеце нашу адкрытасць у гэтай сітуацыі. А Расія была больш закрытая тут", - адзначыў Прэзідэнт.-0-
