22 чэрвеня, Мінск /Кар. БЕЛТА/. Нацыянальная эканоміка за кошт інвестыцый павінна стаць інавацыйнай па сваёй сутнасці. Аб гэтым заявіў Прэзідэнт Беларусі Аляксандр Лукашэнка сёння на V Усебеларускім народным сходзе, перадае карэспандэнт БЕЛТА.
Вопыт многіх развітых краін сведчыць, што іх эканамічная канкурэнтаздольнасць, роля і ўплыў у сусветнай эканоміцы, узровень і якасць жыцця грамадзян залежаць непасрэдна ад інавацый і развіцця "разумнай" эканомікі, звярнуў увагу кіраўнік дзяржавы. Сусветная прамысловасць знаходзіцца ў стадыі пераходу да наступнага тэхналагічнага ўкладу. "За кошт інвестыцый нацыянальная эканоміка павінна стаць інавацыйнай па сваёй сутнасці. У гэтым вялікі рэзерв аднаўлення яе канкурэнтаздольнасці. Таму трэба кіравацца правілам, што важнейшая сфера капіталаўкладанняў - інавацыі, гэта значыць стварэнне новай, навукаёмістай прадукцыі, канкурэнтаздольнай на сусветным рынку", - падкрэсліў Аляксандр Лукашэнка.
Для гэтага трэба ўдасканальваць структуру прамысловага комплексу, ствараць і развіваць навукаёмістыя сектары, адзначыў беларускі лідар. Па выніках апошняга рэйтынгу Беларусь увайшла ў дзясятку краін з эканомікай ведаў, што найбольш дынамічна развіваецца. Па намінацыі "навука і тэхналогіі" рэспубліка займае 37-е месца сярод амаль 170 краін свету.
"У наступнай пяцігодцы патэнцыял "разумнай" эканомікі трэба сур'ёзна нарасціць", - заявіў кіраўнік дзяржавы. Зрабіць гэта плануецца за кошт развіцця высокатэхналагічных вытворчасцей - мікраэлектронікі, лазерных, бія- і нанатэхналогій, прадукцыі высокадакладнага машынабудавання, якія павінны стаць асновай для павышэння канкурэнтаздольнасці краіны. Таксама намаганні будуць накіраваны на стварэнне ўмоў, пры якіх інавацыйныя расходы, уключаючы прыватныя інвестыцыі, дасягнуць узроўню 1,5 працэнта ВУП у год. "Неабходна сканцэнтраваць навукова-тэхнічны патэнцыял краіны на прарыўных навуковых даследаваннях і распрацоўках, забяспечыўшы іх практычнае ўкараненне ў вытворчасць", - падкрэсліў Аляксандр Лукашэнка.
"Перад вучонымі Нацыянальнай акадэміі навук, кіраўніцтвам яе і іншых устаноў стаяць па-сапраўднаму маштабныя і адказныя задачы. У перспектыве трэба забяспечыць атрыманне новых ведаў сусветнага ўзроўню. Перш за ўсё ў галіне распрацоўкі і стварэння ўстройстваў новага пакалення, гібрыдных біядатчыкаў і сэнсараў, робатаў і штучнага інтэлекту. А таксама больш дынамічна развіваць тыя напрамкі, дзе ў нас ёсць добры навукова-тэхнічны задзел, заснаваны на распрацоўках айчынных вучоных у сферы электронікі, нанаматэрыялаў, фатонікі, мікрабіялогіі, тонкай хіміі, вытворчасці лазерных крыніц", - адзначыў кіраўнік дзяржавы.
Але гэта не азначае адмовы ад развіцця традыцыйных галін, стратэгічна значных для краіны, звярнуў увагу Прэзідэнт. Напрыклад, ад вытворчасці харчовых прадуктаў, сельскай гаспадаркі, вытворчасці нафтапрадуктаў і іншага. "Высокапрадукцыйны інавацыйны сегмент павінен стаць магутным лакаматывам, які пацягне за сабой уздым базавых галін - металургіі, машынабудавання, хімічнай, радыёэлектроннай, лёгкай прамысловасці. Тым самым гэтыя прадпрыемствы атрымаюць імпульс для абнаўлення тэхналагічнай базы і забяспечаць новыя высокапрадукцыйныя і высокааплатныя рабочыя месцы", - упэўнены Аляксандр Лукашэнка.-0-
