8 ліпеня, Мінск /Кар. БЕЛТА/. Зацверджаны дапаўненні і змяненні ў Дзяржаўную праграму інавацыйнага развіцця Беларусі на 2016-2020 гады. Адпаведны ўказ нумар 254 падпісаў 7 ліпеня кіраўнік дзяржавы Аляксандр Лукашэнка, паведамілі БЕЛТА ў прэс-службе Прэзідэнта.
Дакументам прадугледжваецца карэкціроўка пераліку праектаў па стварэнні вытворчасцей, якія маюць вызначальнае значэнне для інавацыйнага развіцця Беларусі. У яго ўключаюцца 8 праектаў, накіраваных на стварэнне вытворчасцей новага пакалення аўтамабільных кампанентаў, керамічных вырабаў, сучасных тэхналогій у лёгкай і харчовай прамысловасці, дрэваапрацоўцы, а таксама будаўніцтва корпуса для стварэння цэнтра гібрыднай кардыяхірургіі па аказанні высокатэхналагічнай медыцынскай дапамогі пры лячэнні сардэчна-сасудзістых захворванняў.
Зацвярджаецца выкарыстанне сродкаў інавацыйных фондаў на фінансаванне праектаў у галіне машынабудавання, аховы здароўя, сельскай гаспадаркі.
Прыняцце ўказа будзе садзейнічаць развіццю інавацыйнай дзейнасці ў галінах і рэгіёнах, дасць магчымасць накіраваць неабходныя рэсурсы для стварэння высокатэхналагічных вытворчасцей і выканання праектаў сацыяльнай накіраванасці.-0-
