6 сакавіка, Мінск /Кар. БЕЛТА/. Прэзідэнт Беларусі Аляксандр Лукашэнка ў Мінску наведаў выстаўку найноўшых расійскіх беспілотных авіяцыйных сістэм "Дэманстрацыя рашэнняў галіны БАС", паведамляе БЕЛТА.
У ліку ўдзельнікаў мерапрыемства з расійскага боку былі намеснік кіраўніка Адміністрацыі Прэзідэнта Расіі Максім Арэшкін, спецпрадстаўнік Прэзідэнта Расіі па пытаннях лічбавага і тэхналагічнага развіцця Дзмітрый Пяскоў.
Прэзідэнт Лукашэнка расказаў аб планах наведаць гэту выстаўку нядаўна пры прыняцці кадравых рашэнняў па новым складзе ўрада. "У сябе трэба больш актыўна разгортвацца. Попыт вялікі", - адзначыў беларускі лідар.
Сярод экспанатаў выстаўкі - дроны для сельскай гаспадаркі, маніторынгу мясцовасці, грузавыя дроны.
Напрыклад, комплекс Gemini ад кампаніі "Геаскан" выкарыстоўваецца для аэрафотаздымкі. Дзякуючы кампактнасці апарата магчыма здымка ў гарадскім асяроддзі і месцах са складаным рэльефам. Выкарыстоўваецца ў тым ліку для стварэння 3D-мадэлей помнікаў культуры і маркшэйдарскіх работ.
БПЛА "Страказа" ("Лабараторыя будучыні") дазваляе сачыць за станам ЛЭП і рамантаваць правады непасрэдна ў паветры.
Яшчэ адзін экспанат - SeaDrone, распрацаваны ТАА "Дрон Салюшнс". Гэта БПЛА, які ўмее садзіцца на ваду і працаваць нават у экстрэмальных умовах паўночных шырот. Ён здольны выконваць задачы па відэаздымцы і пераносе грузаў вагой да 5 кг. Выпрабаванні дрона праводзіліся ў Карскім моры ў Арктыцы.
OG-40Е вытворчасці кампаніі "Глоры Эйр" - дрон самалётнага тыпу, абсталяваны электрычным рухавіком і парашутнай сістэмай, прызначанай для ажыццяўлення пазаштатных пасадак на непадрыхтаваныя пасадачныя пляцоўкі і грунты.
Увазе кіраўніка дзяржавы прадставяць і дрон-мастак (ТАА "СВЕРХ"). З яго дапамогай устаноўлены сусветны рэкорд - намаляваны мурал, памеры якога складаюць 300 кв.м. Гэты мурал стаў самым вялікім у свеце арт-аб'ектам, створаным дронам. Для вырашэння задачы была распрацавана прынцыпова новая сістэма пазіцыянавання, якая сумяшчае інфармацыю з камеры высокага распазнавання, бартавога лідара і інерцыяльнай навігацыйнай сістэмы. У 2024 годзе была распрацавана новая версія дрона, якая падтрымлівае групавую работу. На "Архіпелагу-2024" у Паўднёва-Сахалінску мурал стваралі ўжо два дроны адначасова, прычым на гэты раз яны малявалі сумесна з мастаком.
Выстаўка арганізавана для дэманстрацыі вынікаў рэалізацыі ў РФ нацыянальнага праекта, прысвечанага беспілотным авіяцыйным сістэмам, а таксама вынікаў работы Нацыянальнай тэхналагічнай ініцыятывы.-0-
Падпісвайцеся на нас у
