12 красавіка, Благавешчанск /Кар. БЕЛТА/. Беларускі борт нумар адзін вылецеў з Благавешчанска ва Уладзівасток. Праграма рабочага візіту Прэзідэнта Беларусі Аляксандра Лукашэнкі прадоўжыцца 13 красавіка ў Прыморскім краі Расійскай Федэрацыі, паведамляе БЕЛТА.
Аляксандр Лукашэнка і Уладзімір Пуцін 12 красавіка, у Дзень касманаўтыкі, наведалі касмадром Усходні ў Амурскай вобласці. Яны прыбылі туды адным верталётам, азнаёміліся з развіццём касмадрома як з паветра, так і на зямлі. Затым кіраўнікі дзяржаў сустрэліся з касманаўтамі і работнікамі Усходняга.
У другой палавіне дня прайшлі перагаворы лідараў дзвюх краін. Аляксандр Лукашэнка і Уладзімір Пуцін абмеркавалі шырокі комплекс пытанняў двухбаковага супрацоўніцтва - ад рэалізацыі праектаў у сферы космасу да гандлю, процідзеяння санкцыйнай палітыцы Захаду, цэнаўтварэння на вуглевадароды, ваеннай бяспекі. Сярод тэм была і сітуацыя ў рэгіёне, падзеі ва Украіне.
Пасля завяршэння перагавораў прэзідэнты падрабязна праінфармавалі аб іх выніках прадстаўнікоў СМІ, адказалі на пытанні.
Аляксандр Лукашэнка і Уладзімір Пуцін зноў разам на верталёце вярнуліся ў аэрапорт адміністрацыйнага цэнтра Амурскай вобласці - горада Благавешчанска, адкуль кіраўнік беларускай дзяржавы накіраваўся ва Уладзівасток. На 13 красавіка там запланавана сустрэча з кіраўніцтвам Прыморскага края і наведванне шэрага аб'ектаў. Галоўная тэма - перспектывы развіцця разнапланавага супрацоўніцтва Беларусі з далёкаўсходнім рэгіёнам.-0-
