10 снежня, Мінск /Міхаіл Маціеўскі - БЕЛТА/. Беларусь гатова да адкрыцця свайго пасольства ў Судане. Аб гэтым Прэзідэнт Беларусі Аляксандр Лукашэнка заявіў сёння журналістам пасля перагавораў з Прэзідэнтам Судана Амарам Хасанам Ахмедам аль-Башырам, перадае карэспандэнт БЕЛТА.
"У нас выдатныя палітычныя адносіны, і мы вітаем адкрыццё суданскага пасольства ў Беларусі. У сваю чаргу мы гатовы да такіх жа крокаў на тэрыторыі Судана", - сказаў Аляксандр Лукашэнка.
Паводле яго слоў, у час перагавораў з Прэзідэнтам Судана было шмат тэм для прадметнага абмеркавання. "Вынікі перагавораў я ацэньваю як плённыя. Супрацоўніцтва паміж краінамі развіваецца, у апошнія паўтара года заўважаны значны прагрэс. Судан застаецца нашым важным і надзейным партнёрам у Афрыцы", - падкрэсліў кіраўнік дзяржавы.
Бакі абмеркавалі бягучую сітуацыю ў свеце і ў рэгіёнах дзвюх краін. Прэзідэнт адзначыў агульнасць падыходаў Беларусі і Судана па ключавых пытаннях міжнароднага парадку дня.
"Асноўную ўвагу сёння мы ўдзялілі гандлёва-эканамічным адносінам. Прааналізавалі выкананне нашых даручэнняў, ход рэалізацыі сумесных праектаў. У цэлым я задаволены тым, што двухбаковыя адносіны выконваюцца. І беларускія, і суданскія ведамствы сапраўды прыкладаюць намаганні для рэалізацыі намечанага", - дадаў Аляксандр Лукашэнка.-0-
