22 лістапада, Віцебск /Уладзімір Мацвееў - БЕЛТА/. Прэзідэнт Беларусі Аляксандр Лукашэнка прыбыў з рабочай паездкай у Віцебск, каб правесці нараду па развіцці АПК вобласці. Аднак размова на верталётнай пляцоўцы пачалася з тэмы лёгкай прамысловасці, перадае карэспандэнт БЕЛТА.
Кіраўніка дзяржавы па традыцыі сустракалі з букетам кветак дзве дзяўчыны, апранутыя ў верхняе цёплае адзенне ў нацыянальным стылі. Аляксандр Лукашэнка пацікавіўся, дзе яго пашылі. Як аказалася, у Віцебскім дзяржаўным каледжы культуры і мастацтваў.
"А тканіны адкуль?" - прадоўжыў распытваць беларускі лідар.
Дзяўчыны разгубіліся, але старшыня Палаты прадстаўнікоў Нацыянальнага сходу Уладзімір Андрэйчанка, які сустракаў Прэзідэнта, удакладніў - Мінскі тонкасуконны камбінат.
"Ну вось, а кажуць, што мы не ўмеем рабіць тканіны", - адзначыў кіраўнік дзяржавы.
Дзяўчаты ж запэўнілі, што ў гэтым адзенні з беларускай тканіны ім камфортна і цёпла, нягледзячы на даволі халаднаватае і ветранае надвор'е ў Віцебску.-0-
