3 лютага, Масква /Эдуард Півавар - БЕЛТА/. Еўразійская эканамічная камісія і Выканаўчы камітэт СНД зацвердзілі план мерапрыемстваў на 2023-2025 гады па рэалізацыі мемарандума аб паглыбленні ўзаемадзеяння. Дакумент падпісалі 3 лютага ў Алматы старшыня Калегіі ЕЭК Міхаіл Мясніковіч і генеральны сакратар СНД Сяргей Лебедзеў, паведамілі БЕЛТА ў прэс-службе ЕЭК.
"План прадугледжвае рэалізацыю сумесных праектаў і правядзенне мерапрыемстваў. Асаблівая ўвага ў ім удзелена пытанням устаранення існуючых бар'ераў ва ўзаемным гандлі, развіццю супрацоўніцтва па рэалізацыі маштабных сумесных праектаў і лічбавізацыі эканомікі. Таксама плануюцца кансультацыі для выпрацоўкі падыходаў па спалучэнні права ЕАЭС і нарматыўнай базы СНД, у тым ліку ў частцы ліквідацыі супярэчнасцей паміж праектамі нарматыўных прававых актаў, якія распрацоўваюцца ў ЕАЭС і СНД", - адзначылі ў ЕЭК.
Акрамя таго, дакументам прадугледжана садзейнічанне ўключэнню ў працэсы функцыянавання ЕАЭС і СНД моладзі, грамадскіх аб'яднанняў і бізнес-супольнасцей, што арыентавана на павышэнне транспарэнтнасці работы дзвюх структур і большай інфармаванасці грамадзян аб сутнасці эканамічных інтэграцыйных працэсаў.
Мемарандум аб паглыбленні ўзаемадзеяння паміж ЕЭК і Выканаўчым камітэтам СНД быў падпісаны 27 лістапада 2018 года. Ён прадугледжвае супрацоўніцтва ў сферах мытнага рэгулявання, нагляду і маркіроўкі тавараў сродкамі ідэнтыфікацыі, дзяржаўных закупак, абароны правоў спажыўцоў, лічбавай эканомікі, падатковай палітыкі і адміністравання, знешняга гандлю, канкурэнтнай палітыкі і антыманапольнага рэгулявання, а таксама санітарных, ветэрынарна-санітарных і каранцінных фітасанітарных мер.-0-
