27 снежня, Масква /Эдуард Півавар - БЕЛТА/. Генеральны сакратар Арганізацыі Дагавора аб калектыўнай бяспецы Станіслаў Зась лічыць, што зробленыя Расіяй прапановы Паўночнаатлантычнаму альянсу па гарантыях бяспекі павінны знізіць напружанасць каля граніц Беларусі. Аб гэтым ён заявіў у інтэрв'ю мультымедыйнаму выданню "Союзники. ОДКБ", паведамляе БЕЛТА.
Генеральны сакратар адзначыў заклапочанасць нарастаннем крызісных з'яў на граніцах дзяржаў - членаў АДКБ, у тым ліку актывізацыяй спроб ЗША і краін Еўропы аказаць націск на дзяржавы - члены АДКБ - Расію і Беларусь. Ён канстатаваў, што на заходніх граніцах зоны адказнасці арганізацыі абстаноўка таксама далёкая ад стабільнай. "Адбываецца нарошчванне ваеннай інфраструктуры НАТА, у тым ліку груповак войскаў, здольных вырашаць наступальныя задачы, узмацненне варожай рыторыкі, увядзенне новых санкцый, арганізацыя небяспечных правакацый у непасрэднай блізкасці ад граніц дзяржаў - членаў АДКБ, - адзначыў Станіслаў Зась. - Гэтыя падзеі не могуць не хваляваць і, зразумела, яны не застаюцца без увагі арганізацыі. Расія і Беларусь нарошчваюць магчымасці рэгіянальнай групоўкі войскаў, праводзяць сумесныя вучэнні па магчымым адбіцці агрэсіі. Пачалося сумеснае патруляванне стратэгічнымі знішчальнікамі ВКС Расіі і знішчальнікамі ВПС Беларусі заходніх рубяжоў АДКБ. Праводзіцца і шэраг іншых сумесных мерапрыемстваў".
"Лічу, што пасля прапаноў Расіі Паўночнаатлантычнаму альянсу па гарантыях бяспекі напружанасць на Усходне-еўрапейскім напрамку ў зоне адказнасці АДКБ павінна знізіцца. Вайны ніхто не хоча", - заявіў генеральны сакратар АДКБ.
Станіслаў Зась падкрэсліў: АДКБ як арганізацыя, прызначаная абараняць мір і стабільнасць, заўсёды выступала супраць палітызацыі пытанняў, звязаных з міжнароднай бяспекай. "Існуе шэраг напрамкаў, па якіх, з нашага пункту гледжання, супрацоўніцтва АДКБ і НАТА пайшло б на карысць абодвум бакам, - сказаў ён. - У першую чаргу гэта датычыцца барацьбы з незаконным абаротам наркотыкаў, процідзеяння тэрарызму. Наша арганізацыя на ўзроўні кіраўнікоў дзяржаў і міністраў замежных спраў выказвала гатоўнасць да пачатку дыялогу, аднак крокаў у адказ так і не было зроблена. Гэта наводзіць на пэўныя высновы".
Адказваючы на пытанне, што, на яго думку, знаходзіцца ў аснове такога падыходу НАТА, Станіслаў Зась адзначыў: "Нярэдка ўзнікае ўражанне, што ў некаторых рэгіёнах свету пачынаюць забываць аб уроках сусветных войнаў. Хачу нагадаць, што захаванне праўдзівай гісторыі аб Вялікай Айчыннай вайне застаецца адной з важных палітычных і маральных асноў нашай арганізацыі. Перакананы, што абавязак чалавецтва - памятаць не толькі аб пакутах мільёнаў тых, хто загінуў і прайшоў праз пекла вайны, але і аб тым, якія акалічнасці сталі прычынай трагедыі. Гэта вельмі жорсткі палітычны ўрок, ігнараванне якога не абяцае свету нічога добрага. З гэтага пункту гледжання прыкладаў палітычнай высакамернасці наўрад ці можна знайсці рацыянальнае тлумачэнне".-0-
