13 студзеня, Масква /Эдуард Півавар - БЕЛТА/. Арганізацыя Дагавора аб калектыўнай бяспецы сваёй рэакцыяй на падзеі ў Казахстане паказала здольнасць дзейнічаць хутка, рашуча і эфектыўна. Аб гэтым заявіў генеральны сакратар АДКБ Станіслаў Зась сёння ў Алматы на цырымоніі завяршэння міратворчай аперацыі АДКБ на тэрыторыі Казахстана, паведаміў БЕЛТА прэс-сакратар АДКБ Уладзімір Зайнетдзінаў.
"Наперакор распаўсюджваемым некаторымі нашымі нядобразычліўцамі негатыўным ацэнкам дзейнасці АДКБ наша арганізацыя паказала сваю запатрабаванасць і эфектыўнасць, здольнасць дзейнічаць хутка, рашуча і эфектыўна, без прамаруджанняў", - падкрэсліў Станіслаў Зась.
Паводле яго слоў, для Казахстана была прынцыпова важна не толькі ваенная, але перш за ўсё маральная падтрымка саюзнікаў па АДКБ, якая была неадкладна аказана. "У лічаныя гадзіны пасля прыняцця Саветам калектыўнай бяспекі рашэння аб аказанні дапамогі першыя барты з кантынгентамі Калектыўных міратворчых сіл ужо вылецелі ў Казахстан", - нагадаў ён.
Генеральны сакратар АДКБ адзначыў, што ўклад у выкананне міратворчай місіі ў Казахстане ўнеслі ўсе дзяржавы - члены арганізацыі. "Кожны з нашых саюзнікаў унёс свой уклад у выкананне пастаўленых задач у складзе воінскай групоўкі АДКБ, у склад якой увайшлі і паспяхова дзейнічаюць прафесійна падрыхтаваныя міратворчыя кантынгенты ўсіх без выключэння дзяржаў - членаў арганізацыі", - сказаў ён.
"У адпаведнасці з волевыяўленнем казахстанскага боку міратворцы будуць у запланаваныя тэрміны выведзены ў свае пункты пастаяннай дыслакацыі", - запэўніў генеральны сакратар АДКБ.
"Кіраўнікі дзяржаў - членаў АДКБ у ходзе праведзенай 10 студзеня пазачарговай сесіі Савета калектыўнай бяспекі АДКБ адзначылі, што цяперашнія падзеі сталі пераломным этапам у развіцці нашай арганізацыі, якая набыла новыя якасці як моцны міжнародны інстытут. АДКБ - рэальна працуючы механізм забеспячэння стабільнасці і бяспекі нашых дзяржаў", - заявіў Станіслаў Зась.
Ён выказаў шчырыя словы ўдзячнасці ўсім, хто з гонарам выканаў службовы і чалавечы абавязак, абавязак міратворца. "Тыя, хто асабліва вызначыўся, атрымаюць узнагароды Савета калектыўнай бяспекі АДКБ і абаронных ведамстваў дзяржаў - членаў арганізацыі. Жадаю вам поспехаў у вашай ратнай працы і паспяховага вяртання дадому", - сказаў на заканчэнне генеральны сакратар АДКБ.-0-
