ДЗЯРЖОРГАНЫДЗЯРЖОРГАНЫ
Флаг Чацвер, 5 жніўня 2021
Мінск Пераменная воблачнасць +17°C
Усе навіны
Усе навіны
Палітыка
19 мая 2021, 15:00

Зась: абстаноўка практычна па ўсім перыметры граніц дзяржаў-членаў АДКБ застаецца напружанай

Фота з архіва
Фота з архіва

19 мая, Масква /Эдуард Півавар - БЕЛТА/. Пазітыўных змяненняў у сферы глабальнай бяспекі не назіраецца, а абстаноўка каля граніц дзяржаў - членаў Арганізацыі Дагавора аб калектыўнай бяспецы застаецца напружанай. Аб гэтым заявіў журналістам генеральны сакратар АДКБ Станіслаў Зась па выніках праведзенага сёння ў Душанбэ пасяджэння Савета міністраў замежных спраў АДКБ, паведаміў БЕЛТА прэс-сакратар арганізацыі Уладзімір Зайнетдзінаў.

Станіслаў Зась паведаміў, што на пасяджэнні ў вузкім складзе падрабязна абмяркоўваліся стан і перспектывы развіцця міжнароднай і рэгіянальнай абстаноўкі і яе ўплыў на бяспеку дзяржаў - членаў АДКБ. "На жаль, пазітыўных змяненняў у сферы глабальнай бяспекі не назіраецца, - канстатаваў ён. - Абстаноўка практычна па ўсім перыметры граніц дзяржаў - членаў АДКБ застаецца напружанай. Больш актыўна задзейнічаюцца нарошчванне ваеннай прысутнасці і ваеннай актыўнасці краін НАТА каля меж усходнееўрапейскай зоны адказнасці нашай арганізацыі".

Гаворачы аб Каўказскім рэгіёне калектыўнай бяспекі АДКБ, генеральны сакратар адзначыў, што ўвядзенне ў зону нагорнакарабахскага канфлікту расійскага міратворчага кантынгенту і прадаўжэнне перагаворнага працэсу прыкметна палепшылі сітуацыю. "Мы бачым перспектыву ўстанаўлення там доўгатэрміновага міру, - заявіў ён. - Ужо не страляюць, але абстаноўка пакуль напружаная. У АДКБ уважліва сочаць за развіццём абстаноўкі ў прыгранічных раёнах Сюнікскай вобласці Арменіі. Гэта таксама стала тэмай абмеркавання на сённяшнім пасяджэнні Савета міністраў замежных спраў АДКБ. Мы вітаем пачатыя перагаворы паміж армянскім і азербайджанскім бакамі пры пасрэдніцтве Расіі і дасягненне дамоўленасці аб адводзе часткі падраздзяленняў са спрэчных участкаў тэрыторыі. Адзначаем безальтэрнатыўнасць выканання трохбаковых дамоўленасцей ад 10 лістапада 2020 года".

Станіслаў Зась таксама вітаў аднаўленне перагаворнага працэсу і стабілізацыю абстаноўкі ў зоне таджыкска-кыргызстанскай граніцы. У гэтым плане ён асобна адзначыў дамоўленасці паміж прэзідэнтамі Таджыкістана і Кыргызстана па ўрэгуляванні спрэчных пагранічных пытанняў палітыка-дыпламатычнымі метадамі ў духу саюзніцтва і добрасуседства, што ляжаць у аснове дзейнасці АДКБ. "Адзначу, гэта істотна палепшыла сітуацыю ў Цэнтральна-Азіяцкім рэгіёне калектыўнай бяспекі АДКБ, што асабліва важна з улікам вельмі складанай сітуацыі ў суседнім Афганістане. Пачаты адтуль вывад войскаў ЗША і натаўскага ваеннага кантынгенту, на жаль, не дае надзею на дасягненне ўнутрыафганскага мірнага ўрэгулявання", - сказаў генеральны сакратар.

"У такой складанай абстаноўцы ўзрастае роля каардынацыі дзеянняў дзяржаў - членаў АДКБ у пытаннях знешняй палітыкі", - падкрэсліў Станіслаў Зась.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі