3 кастрычніка, Мінск /Кар. БЕЛТА/. У агульных інтарэсах Беларусі і Расіі - нарошчваць узаемавыгадныя і недыскрымінацыйныя адносіны на гандлёва-эканамічным трэку. Такі пункт гледжання выказаў намеснік начальніка ўпраўлення Расіі беларускага знешнепалітычнага ведамства Уладзімір Захарчук, выступаючы сёння на кансультацыях Клуба маладых дыпламатаў МЗС Беларусі і Савета маладых дыпламатаў МЗС Расійскай Федэрацыі, якія праходзяць у Мінску, перадае карэспандэнт БЕЛТА.
Ён падкрэсліў, што прадстаўляе ўпраўленне, якое курыруе ўвесь комплекс двухбаковых адносін з Расійскай Федэрацыяй, у тым ліку ў рэгіянальным разрэзе. У прыватнасці, гэта і тэма інтэграцыйнага парадку дня па лініі Саюзнай дзяржавы. "На сённяшні дзень гэта тэматыка прыярытэтная ў беларуска-расійскіх адносінах і з'яўляецца прадметам дыскусій на розных узроўнях як у Беларусі, так і ў Расіі", - сказаў Уладзімір Захарчук.
Ён звярнуў увагу, што няма ні адной сферы, у якой Беларусь і Расія не мелі б доўгатэрміновых партнёрскіх сувязей. Цесны двухбаковы дыялог ажыццяўляецца ў палітычнай, эканамічнай, сацыяльнай, гуманітарнай, экалагічнай, інфармацыйнай і навукова-інавацыйнай галінах. Рэгулярна сустракаюцца кіраўнікі дзяржаў, кіраўнікі ўрадаў і міністэрстваў. Падтрымліваюцца кантакты паміж профільнымі ведамствамі ў рамках сумесных камісій і міжгаліновых рабочых груп, на ўзроўні асобных рэгіёнаў і суб'ектаў гаспадарання.
"Беларусь і Расія выступаюць з адзіных або блізкіх пазіцый па асноўных праблемах сучаснага свету, падтрымліваюць адна адну на важнейшых міжнародных пляцоўках ААН, АБСЕ і іншых. Мы сумесна развіваем такія інтэграцыйныя праекты, як Саюзная дзяржава, СНД, АДКБ, ЕАЭС", - адзначыў Уладзімір Захарчук.
Паводле яго слоў, традыцыйна значнае месца ў двухбаковых адносінах займае эканамічная праблематыка. "На долю Расіі прыпадае амаль 50 працэнтаў аб'ёму знешняга гандлю Беларусі з усімі краінамі свету, а, згодна з расійскай статыстыкай, наша краіна ўстойліва займае чацвёртую пазіцыю па аб'ёме тавараабароту ў спісе партнёраў Расіі. Таму ў нашых агульных інтарэсах - забяспечваць пазітыўныя тэндэнцыі, нарошчваць узаемавыгадныя і недыскрымінацыйныя адносіны на гандлёва-эканамічным трэку", - заявіў намеснік начальніка ўпраўлення.
Асобна ён спыніўся на рэгіянальным узаемадзеянні, якое атрымала ў апошнія гады новае развіццё дзякуючы ў тым ліку штогадовым форумам рэгіёнаў Беларусі і Расіі. "Па выніках шостага форуму, які прайшоў у ліпені бягучага года ў Санкт-Пецярбургу, падпісана больш за 80 дакументаў аб супрацоўніцтве і кантрактаў на суму звыш $500 млн. Усяго на сённяшні дзень на аснове міжурадавых пагадненняў аб доўгатэрміновым супрацоўніцтве прамыя гандлёва-эканамічныя сувязі падтрымліваюцца з 80 рэгіёнамі Расіі", - прадоўжыў Уладзімір Захарчук.
У снежні будзе адзначацца 20-годдзе падпісання Дагавора аб стварэнні Саюзнай дзяржавы. "За гэты час створаны не маючы аналагаў на постсавецкай прасторы фармат, які шмат у чым стаў прататыпам еўразійскай інтэграцыі. Дасягнуты значныя поспехі ў пытаннях забеспячэння роўных правоў для грамадзян Беларусі і Расіі ва ўсіх сферах, перш за ўсё ў гаспадарчай дзейнасці, атрыманні адукацыі і медыцынскай дапамогі, працаўладкаванні, выбары месца знаходжання і жыхарства, - звярнуў увагу прадстаўнік МЗС. - За кошт сродкаў бюджэту Саюзнай дзяржавы фінансуюцца праграмы ў такіх сферах, як энергетыка, інфармацыйныя тэхналогіі, космас, медыцына, сельская гаспадарка, пагранічная бяспека, пераадоленне наступстваў чарнобыльскай катастрофы.
На яго думку, сур'ёзны ўклад у развіццё ўсяго комплексу двухбаковых адносін уносіць сістэмнае і шматпланавае ўзаемадзеянне паміж дыпламатычнымі службамі. У мэтах каардынацыі сумесных намаганняў на сусветнай палітычнай арэне міністэрствамі замежных спраў прымаюцца праграмы ўзгодненых дзеянняў у галіне знешняй палітыкі. На бліжэйшым сумесным пасяджэнні калегіі міністэрстваў, якое адбудзецца ў лістападзе, плануецца прыняць праграму на 2020-2021 гады.
Уладзімір Захарчук лічыць, што важным механізмам міжміністэрскага дыялогу з'яўляюцца рэгулярныя кансультацыі паміж профільнымі ўпраўленнямі. "Сёння, калі мы сутыкаемся з новымі выклікамі, ростам пагроз, эскалацыяй напружанасці ў свеце, знешнепалітычным ведамствам важна прадоўжыць гістарычную традыцыю, якая заключаецца ў падтрымцы адзін аднаго", - сказаў ён.
Кіраўнік Савета маладых дыпламатаў МЗС Расіі Канстанцін Калпакоў у сваю чаргу падкрэсліў важнась беларуска-расійскага ўзаемадзеяння па ўсіх напрамках і ўзаемнай падтрымкі Беларусі і Расіі на міжнароднай арэне. Ён расказаў пра дзейнасць савета, які ўзначальвае. Канстанцін Калпакоў выказаў меркаванне, што сённяшнія маладыя дыпламаты ўжо ў недалёкай перспектыве будуць прымаць важныя знешнепалітычныя рашэнні. Таксама ён паведаміў аб маючым адбыцца ў лістападзе ў Маскве Глабальным форуме маладых дыпламатаў і аб ідэі стварэння Асацыяцыі маладых дыпламатаў ЕАЭС.-0-
