ДЗЯРЖОРГАНЫДЗЯРЖОРГАНЫ
Флаг Нядзеля, 19 верасня 2021
Мінск Пераменная воблачнасць +6°C
Усе навіны
Усе навіны
Палітыка
07 ліпеня 2021, 20:02

За апошнія два тыдні амаль 1,5 тыс. афганскіх ваенных перайшлі граніцу з Таджыкістанам

Фота  Reuters
Фота Reuters

7 ліпеня, Масква /Эдуард Півавар - БЕЛТА/. За апошнія два тыдні каля 1,5 тыс. ваеннаслужачых урадавых войскаў Афганістана перайшлі на тэрыторыю Таджыкістана. Такія даныя прывёў пастаянны і паўнамоцны прадстаўнік Таджыкістана пры АДКБ Хасан Султонаў сёння на пасяджэнні Пастаяннага савета АДКБ, паведаміў БЕЛТА прэс-сакратар АДКБ Уладзімір Зайнетдзінаў.

Хасан Султонаў праінфармаваў, што ў сувязі са складанай сітуацыяй у раёне граніцы з Афганістанам 5 ліпеня пад старшынствам прэзідэнта Таджыкістана Эмамалі Рахмона адбылося пасяджэнне Савета бяспекі Рэспублікі Таджыкістан. "Было даручана накіраваць дадатковыя войскі ў раёны таджыкска-афганскай граніцы, - адзначыў пастаянны прадстаўнік Таджыкістана. - Кіраўнік дзяржавы таксама даручыў удзяліць асаблівую ўвагу прадухіленню парушэнняў на дзяржаўнай граніцы, у тым ліку папярэджанню транснацыянальнай злачыннасці, тэрарызму, экстрэмізму і незаконнага абароту наркотыкаў. Міністру абароны Таджыкістана даручана мабілізаваць 20 тыс. ваеннаслужачых рэзерву для далейшага ўмацавання граніцы паміж Таджыкістанам і Афганістанам".

"Хацеў бы таксама праінфармаваць, што 5 ліпеня адбыліся тэлефонныя размовы прэзідэнта Таджыкістана з прэзідэнтам Расіі і прэзідэнтам Казахстана, у ходзе якіх галоўная ўвага была ўдзелена рэзкаму пагаршэнню ваенна-палітычнай сітуацыі ў Афганістане, - прадоўжыў Хасан Султонаў. - Кіраўнікі трох дзяржаў - членаў АДКБ падрабязна абмеркавалі цяперашнюю трывожную абстаноўку ў паўночнай і паўночна-ўсходняй правінцыях Афганістана, якія мяжуюць з Таджыкістанам. Яны падкрэслілі, што таджыкска-афганскі ўчастак граніцы мае стратэгічнае значэнне ў плане забеспячэння бяспекі паўднёвых рубяжоў арганізацыі".

Пастаянны прадстаўнік запэўніў, што Таджыкістан як краіна з самай працяглай граніцай з Афганістанам прымае неабходныя меры па стрымліванні сітуацыі і процідзеянні пагрозам і выклікам, што зыходзяць з гэтай краіны. "Але, улічваючы бягучую сітуацыю ў рэгіёне, а таксама тое, што асобныя ўчасткі граніцы з Афганістанам знаходзяцца ў цяжкадаступнай горнай мясцовасці, паасобку справіцца з гэтай задачай з'яўляецца складаным, - заявіў ён. - Гэтыя абставіны патрабуюць ад нас адэкватнага рэагавання ў рамках АДКБ, у тым ліку прыняцця мер па ўзмацненні патэнцыялу па абароне паўднёвых рубяжоў. У гэтым кантэксце актуальнай застаецца неабходнасць забеспячэння выканання рашэння Савета калектыўнай бяспекі ад 23 верасня 2013 года "Аб аказанні дапамогі Рэспубліцы Таджыкістан ва ўмацаванні таджыкска-афганскай граніцы". Таму хацелі б заклікаць дзяржавы - члены арганізацыі ўнесці свой уклад у поўную рэалізацыю названага дакумента".-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі