7 студзеня, Мінск /Аліна Грышкевіч - БЕЛТА/. У Міністэрстве замежных спраў Беларусі адбыўся круглы стол, прысвечаны 100-годдзю беларускай дыпламатычнай службы, якое будзе адзначацца 22 студзеня, паведамляе БЕЛТА.
Удзел у дыскусіі прынялі намеснік міністра замежных спраў Андрэй Дапкюнас, ветэран беларускай дыпламатычнай службы Надзвычайны і Паўнамоцны Пасол у адстаўцы Уладзімір Шчасны, прадстаўнікі акадэмічных колаў: доктар гістарычных навук, прафесар, дэкан факультэта міжнародных адносін БДУ Віктар Шадурскі, прафесар ФМА БДУ Уладзімір Снапкоўскі, дацэнт гістарычнага факультэта БДПУ імя М.Танка Анатоль Вялікі, а таксама намеснік галоўнага рэдактара часопіса "Беларуская думка" Таццяна Шаблыка.
Асноўная ўвага была ўдзелена ключавым гістарычным фактам і перыядам станаўлення і развіцця беларускай дыпламатычнай службы, адзначаны ў рэтраспектыве больш глыбокія гістарычныя карані нацыянальнай дыпламатыі. У гэтым плане вылучаны шэраг белых гістарычных плям, даследаванне і раскрыццё якіх для шырокай грамадскасці можа ўяўляць значную цікавасць.
Адбыўся змястоўны абмен думкамі аб прафесіі дыпламата і яе значэнні для дзяржавы, у тым ліку ў святле прынятых рашэнняў аб заснаванні геральдычных сімвалаў Міністэрства замежных спраў, адзначана важнасць існуючай у Беларусі сістэмы падрыхтоўкі дыпламатычных кадраў.
Прагучалі практычныя прапановы па развіцці навукова-даследчай работы, фарміраванні баз даных, вывучэнні архіўных матэрыялаў. Удзельнікі круглага стала выказаліся за неабходнасць правядзення такіх мерапрыемстваў на рэгулярнай аснове, узмацненне ўзаемадзеяння паміж МЗС і акадэмічнымі структурамі.
З матэрыяламі круглага стала можна будзе азнаёміцца ў студзеньскім нумары часопіса "Беларуская думка".-0-
