18 кастрычніка, Мінск /Кар. БЕЛТА/. Прэс-сакратар МЗС Беларусі Анатоль Глаз па просьбе БЕЛТА пракаменціраваў ад'езд з Беларусі назначанага пасла Францыі Нікаля Дэ Лакоста.
"Так, паводле той інфармацыі, якую мы маем, ён пакінуў нашу краіну. Спадар Дэ Лакост у лістападзе 2020 года прыехаў у Беларусь у якасці назначанага пасла Францыі і ўручыў копіі даверчых грамат міністру замежных спраў Беларусі ў снежні 2020 года. Аднак у далейшым кіраўнік французскай дыпмісіі не выказаў гатоўнасці завяршыць прадугледжаную міжнародным правам і агульнапрызнанай практыкай працэдуру ўступлення на пасаду ў якасці Надзвычайнага і Паўнамоцнага Пасла ў Рэспубліцы Беларусь", - адзначыў Анатоль Глаз.
"У сувязі з гэтым мы былі вымушаны паведаміць французскім партнёрам аб завяршэнні выдадзенага раней беларускімі ўладамі тэрміну згоды на яго назначэнне", - заявіў ён.
У сваю чаргу, пасол Беларусі ў Францыі Ігар Фісенка быў адкліканы ў Мінск на кансультацыі.
"Шчыра шкадуем аб такой пазіцыі нашых французскіх калег. Асабліва хочам падкрэсліць, што гэта мера стала вымушаным крокам. Мы зацікаўлены ў аднаўленні ўзроўню паўнацэннага функцыянавання абедзвюх дыпмісій", - дадаў прэс-сакратар.-0-
