28 снежня, Мінск /Кар. БЕЛТА/. Абвінавачанні Беларусі ў стварэнні існуючай сітуацыі на граніцы не вытрымліваюць ніякай крытыкі, заявіў у час брыфінгу начальнік Дэпартамента міжнароднага ваеннага супрацоўніцтва - памочнік міністра абароны па пытаннях міжнароднага ваеннага супрацоўніцтва Алег Воінаў, перадае карэспандэнт БЕЛТА.
"Міграцыйныя пытанні цяпер выйшлі на самы верх парадку дня ў рэгіёне і прадоўжылі поўнамаштабную кампанію па ўмяшанні ва ўнутраныя справы Беларусі праз прыняцце санкцыйных і іншых неканструктыўных мер у адносінах да беларускай дзяржавы. На фоне міграцыйнага крызісу прыняты пяты пакет антыбеларускіх санкцый. І гэта ўсё, улічваючы той факт, што абвінавачанні Рэспублікі Беларусь у стварэнні існуючай сітуацыі на граніцы не вытрымліваюць ніякай крытыкі", - сказаў Алег Воінаў.
Начальнік дэпартамента падкрэсліў, што Беларусь не з'яўляецца ні крыніцай, ні прычынай гэтай сітуацыі. "Аб гэтым было ўжо неаднаразова сказана на ўсіх узроўнях дзяржаўнай улады. Акрамя таго, відавочна, што Рэспубліка Беларусь, зыходзячы з геаграфічнага становішча і адкрытасці, выступае толькі ў якасці транзітнага пункта на шляху бежанцаў, а канечным пунктам з'яўляюцца краіны Еўрапейскага саюза, перш за ўсё Германія, Францыя і Вялікабрытанія. Ні для каго не сакрэт, што кожны дзень сотні і нават тысячы мігрантаў спрабуюць трапіць у Вялікабрытанію з тэрыторыі Францыі праз праліў Ла-Манш. Але вось чамусьці, прытрымліваючыся заходняй логікі, Францыю не абвінавачваюць у пастаўцы мігрантаў і стварэнні крызісу на граніцы з Вялікабрытаніяй. Гэтак жа тысячы мігрантаў раствараюцца ў Еўропе, пранікаючы праз тэрыторыю іншых дзяржаў Еўропы. І нічога. Палітыка двайных стандартаў атрымліваецца", - адзначыў ён.
Запрашэнні прыняць удзел у брыфінгу былі накіраваны членам Мінскай асацыяцыі ваенных аташэ, а таксама аташэ па пытаннях абароны еўрапейскіх дзяржаў, акрэдытаваных пры Міністэрстве абароны Рэспублікі Беларусь па сумяшчальніцтве (з рэзідэнцыямі ў Маскве і Кіеве). У ходзе брыфінгу замежным аташэ па пытаннях абароны была прадстаўлена актуальная і аб'ектыўная інфармацыя аб стане ваенна-палітычнай абстаноўкі з акцэнтам на неканструктыўныя крокі асобных краін у адносінах да беларускай дзяржавы. Разгледжаны пытанні ваеннай актыўнасці, што прадаўжаецца ў прыгранічных з Рэспублікай Беларусь раёнах, а таксама прыпынення ўзаемадзеяння з асобнымі краінамі ў галіне рэгіянальных мер умацавання даверу і бяспекі. Даведзена пазіцыя беларускага абароннага ведамства аб гатоўнасці да аднаўлення практычнага ўзаемадзеяння, але толькі ў тым выпадку, калі яно будзе канструктыўнае і будзе заснавана на раўнапраўі і ўзаемнай павазе. Пры гэтым першы крок у напрамку размарозкі кантактаў павінны зрабіць тыя краіны, якія ініцыятыўна спынілі супрацоўніцтва з Узброенымі Сіламі Рэспублікі Беларусь.-0-
