13 снежня, Масква /Эдуард Півавар - БЕЛТА/. Віцэ-прэм'еры краін Еўразійскага эканамічнага саюза 14 снежня правядуць пасяджэнне Савета Еўразійскай эканамічнай камісіі ў вочным фармаце, паведамілі БЕЛТА ў прэс-службе ЕЭК.
Члены Савета ЕЭК плануюць абмеркаваць фарміраванне адзінага рынку паслуг у рамках ЕАЭС, прапановы па механізмах фінансавання сумесных праграм і праектаў ЕАЭС, праекта пратакола аб унясенні змяненняў у Дагавор аб ЕАЭС (праект "ІІІ Вялікага пратакола").
Намечана ўнесці змяненні ў правілы арганізацыі правядзення лабараторных даследаванняў (выпрабаванняў) пры ажыццяўленні ветэрынарнага кантролю (нагляду), у адзіны пералік прадукцыі, у адносінах да якой устанаўліваюцца абавязковыя патрабаванні, а таксама зацвердзіць план мерапрыемстваў па забеспячэнні пераходу да ажыццяўлення рэгістрацыі медыцынскіх вырабаў у адпаведнасці з правіламі рэгістрацыі і экспертызы бяспекі, якасці і эфектыўнасці медыцынскіх вырабаў.
У парадак дня пасяджэння ўнесены таксама пытанні аб супастаўным пераліку аб'ектаў ацэнкі маёмасці, што ажыццяўляецца ў рамках функцыянавання адзінага рынку паслуг па ацэнцы маёмасці; аб дакладзе аб вызначэнні ўзгодненых механізмаў удасканалення абмену інфармацыяй паміж падатковымі органамі дзяржаў ЕАЭС з прымяненнем інфармацыйных тэхналогій; аб унясенні змяненняў у парадак разгляду ЕЭК паведамленняў краін ЕАЭС аб прыняцці актаў аб устанаўленні дзяржавамі-членамі выключэнняў з нацыянальнага рэжыму ў сферы дзяржаўных (муніцыпальных) закупак, зваротаў дзяржаў-членаў па пытаннях адмены такіх актаў.
Акрамя таго плануецца ўнесці змяненні ў палажэнне аб Еўразійскім эканамічным форуме і ў план мерапрыемстваў па рэалізацыі стратэгіі еўразійскай эканамічнай інтэграцыі да 2025 года.-0-
