4 чэрвеня, Мінск /Аліна Грышкевіч - БЕЛТА/. Ініцыятыва "Усходняе партнёрства" і ў далейшым павінна заставацца прыярытэтам для Еўрасаюза і яго партнёраў. Такое меркаванне выказаў пасол Румыніі ў Беларусі Віярэл Машану сёння на экспертнай нарадзе "10 гадоў "Усходняму партнёрству": вынікі і перспектывы", перадае карэспандэнт БЕЛТА.
Віярэл Машану растлумачыў, што арганізацыя гэтага мерапрыемства пасольствам Румыніі сумесна з Фондам Конрада Адэнаўэра і экспертнай ініцыятывай "Мінскі дыялог" абумоўлена не толькі неабходнасцю адзначыць гадавіну "Усходняга партнёрства" і румынскім старшынствам у Савеце ЕС. Цяпер адбываецца эвалюцыя ў рэгіёне ўсходняга суседства ЕС, і гэта з'яўляецца стратэгічна важным для Румыніі і іншых дзяржаў - членаў рэгіёна. "Сённяшняе абмеркаванне можа прадэманстраваць, што "Усходняе партнёрства" павінна заставацца прыярытэтам для Еўрапейскага саюза і яго суседзяў", - сказаў пасол.
Віярэл Машану ўпэўнены, што 10-я гадавіна - цудоўная магчымасць ацаніць дасягненні "Усходняга партнёрства" і пачаць усебаковае абмеркаванне прыярытэтаў на наступнае дзесяцігоддзе. Не так даўно ў Бруселі прайшлі святочныя мерапрыемствы, прысвечаныя гэтаму юбілею, у прыватнасці міністэрская сустрэча УП і канферэнцыя высокага ўзроўню з удзелам лідараў ЕС і краін "Усходняга партнёрства".
Віярэл Машану адзначыў, што ініцыятыва ЕС аказалася бяспройгрышнай, нягледзячы на тое, што часам былі крытычныя моманты ў яе развіцці. Паводле яго слоў, "Усходняе партнёрства" ўносіць уклад ва ўмацаванне эканомікі і грамадства ўсходніх суседзяў, стабільнасці на граніцах ЕС і пашырае магчымасці для супрацоўніцтва. Гэта дапамагае лепш інтэграваць эканоміку партнёраў у еўрапейскі рынак, развіваць малыя і сярэднія прадпрыемствы, прыцягваць інвестыцыі.-0-
